Nimin khan a vawikhatna atan March ni 9 atanga tan Kolasib District Inter Village Sports Meet chu a kharna programme Diakkawn GSA Playground ah hman a ni a, he hun hi Kolasib bialtu MLA Pu P.C. Zoram Sangliana’n khuallin niin a hmanpui a ni. Kharna programme hi KVI Chairman Pu K. Lianzuala pawhin a hmanpui a ni.
Pu P. C. Zoram Sangliana chuan rual awhna atanga chhuak leh thalaite talent haichhuahna atan leh District mipuite inkara inunauna leh inhmangaihna thinlung a than chak chhoh zel nan, a vawikhatna atana hetianga District huap Sports Meet buatsaih a ni chu lawmawm a tih thusawiin hei hi a bultanna a ni a, chhunzawm zel theih thei nise, sports lamah hmasawnna kan neih belh ka ring a ni, a ti a. Hetianga Sports Meet buatsaih chu infiammi te talent haichhuahna tha tak anih thusawiin District a infiammi te chu mahni inthlah dul lova an sports discipline theuha thahnem ngai taka tan la turin a chah a. Mipat hmeichhiatna, zu leh ruihtheih thil laka fihlim turin leh kawng engkima an nun uluk turin a chah bawk a ni.
Kharna programme hi Dr. Zahmingthanga, Chairman Kolasib District Sports Committee chuan kaihruaiin Pu Andrew V.L. Auva, Secretary, Kolasib District Sports Committee hnen atangin report tawi ngaihthlak a ni a. A report ah hian Kolasib Assembly bialtu MLA in cheng nuai 3; Turial Assembly bialtu MLA in cheng nuai 1 leh Serlui Assembly bialtu MLA in Rs. 40,000 he Sports Meet atan hian an thawh thu a tarlang a ni.
Kolasib District Inter Village Sports Meet hi March ni 9 khan tan niin infiammna chi 5 – football, volleyball, table tennis, athletics leh tug of war ah te inelna siam a ni a, a zavaiin infiammi 950 vel an tel a ni.
