Pu H.Rohluna School Education Minister chuan Hualliana memorial Football Running Trophy 2016 kharna hun ni 19.3.2016(Inrinni) khan Hmuntha-ah a hmanpui.

Pu H.Rohluna chuan thusawiin kan ramin infiamna lamah nasa takin hma a sawn a, tunkum 6/7 chhungah phei chuan hmasawn ber State kan ni a. Infiamna lamah Sorkar-in theih tawp a chhuah a, thalaite zingah hmasawnna nasa tak hmuh tur a awm a ni a ti. I.League khelh mekah pawh State pakhatah chuan Team hrang hranga khel zingah Player ngah ber kan niin sawi a ni a ti bawk. Infiamna hlawhtling turin tih tak takna leh insum theihna leh taksa tih hrisel a ngai a, heti lama tan la turin infiam mite a fuih a ni. Pu Rohluna chuan zirna lamah hmasawn a tulzia sawiin Nu leh Pa te pawhin Fate zir that leh that loh ngaihven a tul a ni a ti a. Hualliana High School, Hmuntha atanga HSLC Exam ah Division tha tak taka pass an awm thin chu chhunzawm zel turin a fuih bawk.

Hualliana Memorial Football Running Trophy hi Pu K.Lalsawmvela Chief Engineer PWD te chhungkua in an pa Hualliana hriatrengna atana an buatsaih a ni a, Hmuntha khua leh a chhehvel, Maite, Baktawng, Tlungvel Gate Veng leh Chhingchhip Venghlun atangin Team 10 an tel a, Final hi Hualliana FC Hmuntha leh Hualtu GSA-1 ten an khel a ni.

Minister hian Chhingchhipah Sainik School Building sak mek chu a tlawh nghal a. Hnathawktuten lo dawngsawngin an hnathawh dan an lo hrilhfiah a. Kumin July thlaah Hostel Building thenkhat te leh Academic Building te, Mess Room te chu sak pum theih an beisei thu an lo hrilh a. Kum 2017-18 session atangin Class-VI tan theih an tum thu leh class tinah Zirlai 60 zel an awm tur thu te, kumtin hawn belh zelin pawl 12 thleng hawn a nih tur thu an lo hrilh bawk.