Vawiin chawhma lam khan Kolasib bialtu MLA Pu PC Zoram Sangliana chuan Kolasib khaw dai, Rengtekawn thlang, Di hmun zawl a UD&PA Deptt hmalakna a sak mek bawlhhlawh sawngbawlna (solid waste management) tur  tlawh in,hmalakna te a en pui.

He bawlhhlawh sawngbawlna  tur ah Kolasib veng hrang hranga mi te bawlhhlawh chu lirthei hmanga lak khawm anih hnu ah bawlhlawh te chu a tawih thei leh theilo ah thliar hrang in, a tawih thei te chu a sawngbawlna hmun ah dah in Lei tih thatna atan siam ani anga,tawih theilo te chu a paihna hmun bik a siam ah paih ani ang.

Bialtu MLA chuan, "UD&PA Deptt changtu Minister Pu Zodintluanga duhsakna a zarah Kolasib in bawlhhlawh sawngbawlna hmun tur(solid waste management) kan nei tur chu vanneih thlak a tih thu sawi in,Mizoram a  hmalakna hmasa ber 'pilot project' atana Kolasib a rawn thlang chu lawmawm a tih thu a sawi.

MLA chuan, kan duh ber chu sorkar hmalakna te tha taka thawh zawh ani,tiin,contractor te hna thawh uluk taka vil tur leh thawk tha duhlo an awm anih chuan huaisen taka hmala ngam turin amah tawiawmtu Kolasib DUDO Pi PC Zonunsangi leh   thawktu dangte chu a chah.

Kolasib a solid waste management tur hi kum 2016 atang khan hnathawh tan ani a,tun dinhmun ah hnathawh tur 70% zawh ani tawh a, hnathawh hun chhung(working season) a tam tawk loh avangin he project hi zawh hun tur sawi theih anih loh Department hotute chuan an sawi a, chutih lai erawh chuan chak taka hmalak chho zel an tum thu an sawi bawk.

Hemi hnu hian Pu PC Zoram Sangliana chuan Venglai Parish hall ah Entrepreneurship Development and Awareness Programme on Udyami Mitra Portal chu a hmanpui bawka. Small Industries Development bank of India bultumn Loan chi hrang hrang lak theih ani chu mi tamtak tan eizawnna bul tan nana thil tangkai a nih theih thu sawiin heng loan chi hrang hrang awmte zirchianga chhawr tangkai tum turin kalkhawm zirlai te chu a chah a , an mahni chauh nilo an nu leh pa unau hnathawh neilo te tan thil tangkai tak anih theih avangin hrilhriatna kawnga tanlak a ngaih thu asawi bawk. Kumin HSLC leh HSSLC result chhuaka Kolasib atanga zirlai titha tak tak naupang an awm chu a lawmpui thu sawiin chutih laiin la hlawhtling velo te chu a tawrhpui thu sawi bawkin hnual mai loa bei tang tang turin a fuih a, chu chuan hlawhtlinna kawngah a hruai ngei tur thu a sawi ani. Khuallian chuan tum nei a lehkha zir a pawimawh thu sawiin mahni nih tum a zirin a kawng zawh dan tur te pawh thlan thiam a ngai a, midang pawh rawn hreloa, hlawhtlin tum na nena zir turin kalkhawm te chu a fuih bawk ani.