Vawiin khan Transport Minister Pu P.C. Zoram Sangliana chuan Kolasib New Diakkawn YMA Volley Ball Court a hawng a. Hemi hnu hian Kolasib Inter Village Football Tournament kharna hun Diakkawn Field-ah a hmanpui.

Thu sawiin Pu PC Zoram Sangliana chuan Social Welfare Deptt. kaltlanga Volley Ball Court tha tak siam a ni chu a lawm thu a sawi a. Game thianghlim tak hmanga thalaite hun hmanna tur leh nunchan an zirna hmun tur a ni a. 2008 inthlan dawna kan thu tiam Thangtharte tana khawvel thar din tih kha a tak a chang chho zel a. Tunah chuan khelmual changkang tak takte, infiamna hrang hrang court te kan siam chho ta zel a. Hei hi a chhan chu a nachang hria, mahni thutiama ding in vote vang a ni a. Mipui ten in vote chhuah liau liau a ni, Pu Ramsanga chuan a ti a ni. Kan intiamna dang NLUP pawh kha Centrala kan hotuten min phurpui em avangin kan sum dil zat 1500 vbc chu 2873 vbc laia min rawn tihpun sakin chu chu loneitute tana budget dah bakah an thar chhuah phurh nawm nana kawng sialna tur te, kudam sakna leh thawktute veivahna tur motor leina tur zawng zawng min rawn chhawh chhuah sak vang a ni, a ti bawk. Volley Ball Court sir ko zau tak Retaining Wall rem tul an tih thu YMA ten anlo thlen chu a tihsak nghal tur thu Minister hian a sawi nghal bawk a ni.

Red Ribbon football tournament-a thalai inkhelte chuan a takin Chan chin tha an puang chhuak a ni tih sawiin Minister chuan pawisawi lo nunna tamtak suattu HIV tirem tura hetiang kawnga hma lak a ni hi a ropui hle a ni, a ti a. Kan ram siam turin hei hi a tul hle reng a ni, a ti.

Vawiina Volley Ball Court Minister-in a hawn tak hi 162 sq. mts a zau a ni a. A sirah Pavillion sak a niin Social Welfare Deptt. Bultumin cheng nuai 6 sengin Pu C. Lallura, Kolasib chuan a thawk a. Nikum October thla khan hna hi a thawk tan a ni.

Kolasib Inter Village Red Ribbon Football Tournament-ah hian District chhunga VC 21 te an tel kim a. Player 380 awmin Match 25 khelh a ni a, final khelh hma hian goal 123 tihluh a ni. Vawiin hian Project Veng leh Diakkawn team ten Final an khel a ni.

Ministe hi a nupui Pi Lalthlamuani’n a tawiawm a ni.