Ni hnih awh Kolasib NLUP Kutpui chu vawiin tlai khan bialtu MLA, MIFCO Chairman ni bawk Pu PC Zoram Sangliana'n a khar.

Kharna inkhawm ah hian khuallian chuan thu sawiin kuthnathawk rinawm leh taima te puala buatsaih NLUP Kutpui chu hlawhtling taka huaihawt a nih avangin lawmawm a ti a, he Kutpui hlawhtlin nana hun leh tha leh suangtuahna sengtu NLUP Line Department zawng zawng leh District Administration chungah lawmthu sawiin Kut hlut tu Kolasib mipuite chungah pawh lawmthu a sawi bawk a ni. Hemi bakah hian NLUP tanpuina dawngtu mi rinawm leh taima te chu fakawm a tih thu sawiin Kut hnathawh hi mi taima te tan chuan dinchhuahpui na leh innghahna tlak a nih thu a tarlang a, Sawrkar chuan a mamawh an awm chhung chuan NLUP chu chhunzawm zel a tum thu sawiin Mizo thalaite tan kawng hrang hrangah hmasawnna leh hmalakna tur kawng hrang hrang pawh Sawrkarin a ruahhman mek zel thu a sawi bawk.

Khuallian chuan Kolasib District chu kawng hrang hranga a theihna (potential) avangin Mizorama District pawimawh ber te zing ami a ni chho mek a  mipuite chu taima taka suangtuahna leh hmalakna tur kawng hrang hrang dap zel turin a sawm a. NLUP kutpui a pangpar show tih tel a nihna chhan chu Pangpar a bikin Anthurium khawi chu Kolasib District theihna sang tak a nih angin Pangpar khawitute tuichhuah nan tihphur nana tih tel a nih thu a sawi a ni.

He hunah hian Horticulture Department leh Florists' Association te buatsaih Flower Show cum Sale a Stall 6 te zingah Derhken Stall chu Queen of the Show a thlan a ni a (lily pangpar), Best flower exhibitor ah Dingdi Stall thlan niin pawisa fai cheng 2000 an dawng a, pahnihna  nauban Stall chuan pawisa cheng 1500/- dawng in pathumna ah Derhken Stall niin pawisa fai cheng 1000/- an dawng  ani. Hemi bakah hian Stall nei te hnenah participation prize pek theuh an ni a, heng lawmman te hi khuallian chuan a hlan ani.