Kolasib Assembly Constituency bialtu MLA Pu PC Zoram Sangliana chuan tukin khan Venglai field a Kolasib Stadium sak mek chu a tlawh.

Pu PC Zoram Sangliana chuan Stadium sak hna thawktu Contractor M/S Balajee Developers Engineer te kawm in, hna thawh mek ah harsatna an tawh leh tawhloh te zawtin Stadium chu Kolasib mipuiten a hma thei ang bera an chhawr tangkai theihnan hna thawktute chu a hun taka hna thawk zo turin a ngen a ni. Engineer te chuan Bialtu MLA chu hna thawhna kawngah harsatna a awmloh thu lo hrilh in March 2018 a sak zawh hman ngei an tum thu an hrilh bawk a ni.

Kolasib Stadium sak mek hi Chief Minister Pu Lal Thanhawla’n March 2015 khan a lungphum a phum a, Ministry of Urban Development, Govt. of India atangin a sakna tur sum sanction tur niin UD&PA Department, Government of Mizoram chu Nodal Department a ni a. Project Estimate hi Rs 2268.43 lakhs niin Utilization Certificate (UC) hi cheng 1868.92 lakhs hu thehluh tawh a ni a heta tang hian cheng 1568.72 lakhs hmuh tawh niin a bak 300.20 lakhs chu la hmuhloh a ni a, hei hi hmu thuai tura an in beisei thu Project Engineer te chuan an sawi a.  Stadium sak hnathawh hi tun dinhmunah 82% vel hna thawh zawh tawh a ni a, Central Sawrkar atanga sum sanction dana zirin march 2018 a sak zawh tura ruahman a ni. Football Ground zauh zawng tur hi 6500 sq.mts niin 8 lane synthetic running track siam a ni bawk anga, 2 wheelers 200 tan leh motor te 50 tan parking na hmun te leh seating Capacity hi mipui tan seat 720 vel niin VIP Gallery ah mi 120 vel thut theih tura ruahman a ni.

Bialtu MLA hi Kolasib Bawrhsap Pu R Zarzosanga, District Urban Development Officer Pu Mark Lalthanliana leh UD & PA Official dangten an tawiawm a ni.