MIFCO Chairman , Kolasib Assembly Constituency bialtu MLA ni bawk Pu PC Zoram Sangliana chuan vawiin khan Parish Hall, venglai ah SIRD & PR leh LAD tangkawpa buatsaih Kolasib District Village Council Conference cum Panchayat Sammelan a hmanpui.

Khuallian chuan inthlang ram (Democracy) ah Grassroot Democracy pawimawhna sawiin thuneitu tak tak chu mipuite an ni a, an ai awh turin VC leh MLA te an thlang thin a ni a ti. Sawrkar in mipuite hamthatna tur leh khawtlang/ram hmasawnna tura a thil ruahman thin chi hrang hrangte chu Sawrkar Department te kaltlangin VC te kutah hlan thin a ni a, Khawtlang tana kutthlak tu tak tak chu VC te an nih thu tarlangin VC kalkhawm te chu an enkawl mipuite tana VC rintlak leh VC belhchiandawl ni turin a fuih a. Khawtlang enkawltu tura mipuiten an vote hlu tak senga an thlantlin avangin an Vote zawn laia intiamkamna te leh manifesto te chu bawhzuia Pathian leh mipuite hriatpui tlaka hna thawk tura fuihin mahni hnathawh leh khawtlang enkawl dan in en let fo a, a thalo lai siam tha zel turin a chah a chu chuan khawtlang leh ram hmasawnna a thlen dawn a ni a ti. Khawtlang leh Ram hmasawnna a tana an kuta thil tamtak awm chu dik tak leh rinawm taka hmang tangkaiin khawtlang nuam leh ram hmasawn siam turin kalkhawm VC Member te chu a sawm a ni.

VC Conference hi Kolasib Bawrhsap Pu R Zarzosanga’n a kaihruai a, ni 2 awh tur niin a ni 1 na ah hian VC leh PRI khaikhinna chungchangah Dr. M.S. Dawngliani, Sr. Core faculty (Agri) SIRD & PR in zirtirna a pe a, Pu Lallianmawia E.E. PHE in Swachh Bharat Mission chungchang sawiin Pi Sylvie Z Ralte, CJM Kolasib in Human Rights chungchangah zirtirna a pe bawk a ni. Ni 2 na ah VC Member kalkhawm a duh apiangin experience Sharing an nei anga hemi bakah hian VC Rorel a awm dawn bawk a ni.

He hunah hian Kolasib District a VC hnathawktha 3 te hnenah lawmman sem a ni a, pakhatna hi Lungdai VC niin lawman pawisa fai cheng 5000 leh trophy a keng tel a, pahnihna Bilkhawthlir North VC an ni a Trophy leh cheng 3000, Pathumna Kawnpui VC-1 niin Trophy leh Pawisa fai cheng 2000 an dawng a ni. VC Conference ah hian Kolasib DLAO Pu S.T. Lalhmingmawia leh SIRD & PR leh DRDA atangin Official te ,Kolasib a Head of Offices te bakah Kolasib District a VC Member hrang hrangte an tel tha hle a ni.

Attachment

  • Loading attachment...