Transport Minister Pu PC Zoram Sangliana chuan vawiin khan Kolasib Hmar Veng High School,RMSA sum Rs 55,50,460/- senga sak a hawng a. Vawiin vek khan Economics & Statistics Deptt. hnuaia District Research Officer’s Office, Kolasib Venglai-ah a hawng bawk.

Heng hmun pahnihah te hian thu sawiin Pu PC Zoram Sangliana chuan hmasawnna tamtak thleng chho mekte hi mipui ten kum 2008 inthlan dawna kan ti ang tia thutiam neite in vote hlu tak in pek vang a ni a.

Tun Sawrkarah hian kan ti ang tia thu kan tiam kha a takin kan ti hlawhtling nasa hle a. Kolasib District chhung bikah chuan CZS School provincialised chiah kan hmabak tawh a ni, a ti. Mipui ten dangnal leh hmui themthiam ringawt tehfungah hmang lovin politician tehi kan thutiamah kan ding em tih hi min tehna ni sela. Tuinnge mipui chanai chhuhsaka uchuak tak, rang tak sia sum chhek khawl tih tepawh kan in tehna ni rawh se, a ti a ni.

Pu Ramsanga chuan Inthlan thutiam tihlawhtling theia Pathianin a puih avanga a lawmzia sawiin Mizoram dung leh vangah Infiamna a ni emaw, mipui mimir hamthatna tur In leh Office thar, building thar thahnem tak hawn a ni chu a lawmzia pawh a sawi a. Zirlaite chu mahni kut kea din zir tura fuihin amah ngei pawh M/S a zir atanga a tul apiang thawka mahni intum chawpa zir chhuak a nih thu a sawi a ni. Kolasib-in DRO Office an nei ta chu a lawmpuizia sawiin thil tamtak ti tura khaw penhleh tak tak atanga Aizawl pan kher ngai lova District chhunga tihfel theih a ni ve dawn ta a ni, a ti a. Economics & Statistics chu Deptt. pawimawh tak, research engpawh bei dawn ila, rawn ngei ngei ngai an ni a. Sawrkar laipui pawhin a ngai pawimawh em em a. Deptt. zawng zawngin Data Central sawrkara an thehluh turte lo endik thintu an ni, a ti a ni.

Vawiina Hmar Veng High School building thar hawnna inkhawm hi Pu R. Kapzauva, DEO, Kolasib chuan a kaihruai a. Building hi chhawng 2, a dung 80 ft leh a vang 20 ft a ni a. Class room 4, Hall, laboratory room 1, Art/craft/culture room 1, Science Lab room 1 leh Toilet te a awm a ni.

DRO Office hawnna hi Pu Lalrikhuma Jt. Director, Eco & Stats in a kaihruai a. Pu Saihlira, Director, E & S pawhin thu a sawi bawk. Tun dinhmunah DRO Office hi Pi Lalduhawmi, DRO hovin mi panga in an enkawl dawn a ni.

Minister hi Pu JH Biakmawia, Jt. Director, School Education pawhin a tawiawm a. Vawiin vek khan Pu Ramsanga chuan Govt. Kolasib High School building a hawng bawk a ni.

Attachment

  • Loading attachment...