Kolasib Bialtu Transport Minister Pu PC Zoram Sangliana chuan vawiin khan a bial chhung khaw hrang hrang atanga NLUP Agriculture hnuaia eizawngtu mi 107 te hnenah pawisa 3rd instalment a sem a. Vawiin vek khan Industries hnuaia Tailoring trade thlangtu mi 55 leh petty trade thlangtu mi 3 te hnenah 2nd instalment a hlan bawk.

NLUP (Agri) tangka semna inkhawm hi Kolasib Project venga AMFU Hall-ah neih a ni a. Minister-in tanpuina a sem tak te hi WRC I-ah mi 38, WRC II-ah mi 14, Oil palm chingtu 42 leh Fu chingtu mi 13 te an ni a. Industries hnuaia tangka semna inkhawm hi Diakkawn Hall-ah neih a ni.

Thuchah sawiin Pu PC. Zoram Sangliana chuan mipui ten an vote chhuah liau liau, miretheite tlangram lo neih bansan a eizawnna ngelnghet neihtirna turin kan intiam kam ang ngeiin NLUP sum hi pek in ni a. Politician tehi kan tihtur intiamah kan ding em tih hi mipuiten min tehna tur a ni, ati a. NLUP hi a policy a that em avangin Central pawn min phurpui a. A tira cheng 1600 vbc. kan dil kha kan mamawh tur zawng zawng hna thawh nana motor leina tur thlenga min rawn chhut chhuahsak hnuah Sawrkar laipui chuan 2800 vbc in a rawn pun a, programme tha hi chuan a petu a au ei thin a ni, a ti. PM special package a ni emaw, plan sum a ni emaw-ah kan buai lova, mipui mamawh a taka thawh hi kan tum ber a ni, Pu Zoram Sangliana chuan a ti a ni.

Minister chuan tunlai khawvelah a lungleng zawng leh thudik hrula thil sawi a hun tawh lova, a taka thawha ramin a thatpui tur thil ngaihtuah a hun a ni, a ti a. NLUP kalpui mek chu sawichhiatna leh demna tamtak awm bawk mahse, mi tamtakin dinchhuahpui nan an hmang ta mek a. NLUP hmasa zawk pawh kha 30 % a hlawhtling a, tun thlenga thatchhuahpui mi engemawzat an awm a ni, a ti. Amaherawhchu hei hi Sekibuhchhuak tha ngai a nih avangin a dawngtute chu inthlahdah lova an intiamkamna ang ngeia thawk turin a chah a ni.

Vawiina NLUP semna inkhawm, Diakkawn Hall-a neih hi Pu Zairemmawia, Addl. DC chuan a kaihruai a. DC Pi Niharika Rai chu khualzahawm niin a hmanpui bawk. Agriculture puala inkhawm hi Pu K. Zirliana, DAO-in a kaihruai a ni.

Agriculture hnuaia NLUP 3rd inst. hi a vaiin mi 365 hnenah sem tur a ni a. 3rd instalment atan hian Department lamin an endik danin mi 23 te chu an hna a that loh avanga dawng tlak lovah ngaih an ni a, pek chhunzawm an ni dawn talo a ni.

Industries hnuai a puanthui mi 55-te hnen ah hian khawl chihrang chi thum leh pawisa fai Rs 22,300/- theuh sem ani a, khawl siamtu ten chawhma lam khan an zirtir bawk a ni.