Vawiin khan Art & Culture Minister Pu P C Zoramsangliana chuan Mission Vengthlanga Thalai Hmasawn Pawl (THP) Library Building thar THP Hall chunga sak a hawng.

Pu P C Zoramsangliana chuan Mission Vengthlang YMA Branch in THP Library an enkawl dan chu midangte tan entawntlak leh chuanawm anih thusawiin YMA Branch dangte pawhin Library chungchangah rawn thin se a ti a. Library chu finna leh hriatna thar chhar chhuahna hmun nise tiin thangthar ten tangkai taka an hman theih nan veng chhung mite chu neitu chan chang theuh turin a chah a ni.

Minister chuan thil hlui humhalh kawnga mipuite an thangharh leh hemi kawnga tan an la nasa chu lawmawm tiin, hnam anga ro hrang hrang kan neih te - rimawi, Mizo hmeichhe incheina a bikin puan leh Cheraw leh hnam lam dangte khawvel in a hre chho mek leh phochhuah a ni thin chu ropui a tih thu a sawi bawk a ni.

Library hawna inkhawm hi Branch YMA President Pu Kaisangzuala’n kaihruaiin Branch YMA Secretary Pu Lalhmingmawia’n Library din chho anih dan leh tuna building thar sak dan te a report a ni.

Library hi Raja Ram Mohan Roy Library Foundation Kolkata atanga cheng nuai 6 an dawn leh Lok Sabha MP Pu C L Ruala’n MPLAD kaltanga cheng nuai 4 a pek atanga sak a ni a. Library Floor ah hian Library Room pindan bakah YMA chanchinbu chhutna pindan, inthiarna pahnih leh verandah zau tak a awm a. Library pindan bik hi a dung feet 40 leh a vang feet 29 a ni. THP Library hi kum 1972 din niin tunah chuan Mission Vengthlang YMA Branch in a enkawl mek a. Library hian lehkhabu 6000 an nei a, chungte chu library lehkhabu thliar hranna– Dewey decimal classification hmanga thliar hran vek an ni.