Vawiin khan Ministry thara Horticulture, LAD leh Social Welfare Department-te enkawltu tur a ruat, Cabinet Minister Pu P.C.Lalthanliana chuan a pisa thar a luah tan.

Pu P.C. Lalthanliana chuan office pawimawh tak luah theia a awm chu Pathian leh hotute leh mipuite duhsakna vang a nih thu sawiin, department hotute nena thawhhona tha tak an lo neih thin chu vawn nun zel a tum thu sawi a. Minister chuan, “He office pawimawh tak hi a neitu dik tak, mipuite tana rawngbawlna hmun a ni tih kan hriatreng a tul a; mahni tana inhaivurna tur nilovin, midangte tana malsawmna kan nih theihna kawng a ni,” a ti a; department-a a thawhpuite leh mipuite chu kalsualna laka venpui tura sawmin, Pathian hruaina nen ram leh mipuite tana rawngbawlna chu kalpui zel a tum thu a sawi bawk.

He hunah hian Rev. Sangchema chuan hunserh hmangin fuihna thu a sawia, Parliamentary Secretary, Pu T.T. Zothansanga bakah, LAD leh Horticulture Department Secretary te, chhungkhat laina leh thenrual thaten he hun hi an hmanpui a ni.

Pu P.C.Lalthanliana hi St. Anthony’s College, Shillong atanga graduate niin, Mizoram Legislative Assembly inthlan neih zawk takah khan Lunglei North bial atanga thlan tlin a ni a; 2008 MLA Inthlanah Lunglei North bial atang vekin thlan tlin a lo ni tawh a ni.