3719/2023-2024

LUNGLEI; the 7^th February, 2024: Vawiin khan Pu R. Lalrammawia, Director, Transport Department chuan District Transport Office, Lunglei tlawhin, Transport Department staff te nen inkawmhona hun leh infuih thar lehna hun an hmang.

Pu R.Lalrammawia chuan inkawmhona programme khuhhawn nan staff te fuihna thu sawiin, Transport Department chu kum engemaw chen chu chawibelh Department anga ngaih thin a ni a. Amaherawhchu tun kum 3 liam ta atang khan kalphung te ti danglamin, tunah chuan staff leh motor te indaih loh viau mahse Mizoram sorkar a revenue chhung tam Department kan ni tawh a, bus service-ah pawh chawi belh tawh lovin, profit neiin kan kal ve zel tawh a ni, a ti. Transport Department chu Mizoram sawrkar-a  revenue chhung tam pawl nimahsela, staff bakah Bus indaih lohna a nasa em em, thawktute chu tlemte kan nih tawh avangin inpawh tak leh impumkhat tlata thawk ho thiam tur leh mipuite (customer) te laka hawihawm tur leh dawr nuam taka awm turin staff te chu  chahin, mipui nena in dawr reng an nih avangin an hnathawh kawngah leh dan ken kawh kawngah, dik tak leh fimkhur taka thil kalpui thin turina hrilh hlawm. Transport Department in hmel thar a hmuh a, hma a sawn zel theih nan thawktu zawng zawng ten inthliar mai lova, Department neitu rilru pu theuh turin a chah  hlawm bawk. Director chuan Department ti changtlun nan theih tawp chhuaha hma an lak mek thu a sawi bawk.

Tunah hian Mizoram pumah bus 26 chauh Tranport Department hian a nei tawh a, indaih lohna nasa tak karah Lunglei Town Bus Service tur pahnih(2) an nei chu a lawmpui rualin Lunglei mipuiten he Public Bus hi tun aia hmang tangkai leh zual tura a duhthu a  tarlang bawk. Transport Director chuan kum hmasa lamah late fee chawi ngai lova motor registration leh document dang tih nun (renew) na hun rei tak siam sak anih hnuah pawh, motor 58067 chu Demand Notice pek ngaiin an la awm tho avangin, pek an ni a. Heng zinga 5675 chu “Not to be Transacted”-ah dah tawh niin, Lunglei registration nei motor 467 chu document valid nei tawh lo (Blacklist) tur an ni, a ti. Director chuan dan in a phut angina, hunbi tiam chhungah registration leh document ti fel ngai chu tifel vek tawh turin Lirthei neitute chu chahin, kum dang angina kuminah chuan Late Fee inngaihdamna hun siam anih tawh dawn lo, a ti. Vehicle Enforcement te chu fir tak leh dik tak a motor registration valid lo chu Dan in hrem dan tur a sawi anga hrem ngam turin a chah hlawm.

Tukin zing dar 07:00 khan Director hian Transport Department ram, petrol pump atana hman thin chu tlawhin, Lunglei mipui te tan social asset anih theih nan hmalak a duhthu a sawi bawk.

Transport Department, Lunglei chuan nikum January to December  chhung khan :-

Revenue lakluh zat---------------- ₹ 2,09,72,747/-

Lirthei registered zat----------------2214

Driving Licence pekchhuah zat-------2315

 Learner Licence pekchhuah zat-------3623

Conductor Licence pekchhuah zat------2

Vawiin Director hova inkawmhona programme-ah hian Aizawl atanga Director lo tawiawmtu  Pu Zothangzual Chhangte, JD (Hqrs) leh Pu F. Lalzuithanga, DD (OP) te bakah, Pu Beitlotha Nohro, DTO,Pu Benjamin C. Lalthantluanga, MVI leh DTO 0ffice staff dang te an tel kim hle a ni.