Mizoram Legislative Assembly, Deputy Speaker, Pu R. Lalrinawma chuan vawiin khan Sihphir Branch YMA in Sikni Eng Kut 2014 Sihphir Playground-a an buatsaih chu Kut Pa niin a hmanpui.

Pu R. Lalrinawma chuan Kut thlengtu atan Sihphir pa chhuanawm tak tak, Sihphir-a la awmte leh hnathawhna avanga awm tawh lote an hmang chu a remhriat thlak hle nia a hriat thusawiin hetiang Kut, midangin an neih ve loh ‘Sikni Eng Kut’ ngaihtuah chhuaktu kan rual u te an fakawm hle a ni, a ti.

Vawiina Kut thupui ‘Sihphir mipui inpumkhat lehzual’ tih ang ngeia Sihphir mipuite inpumkhat lehzual nan he kut hi hmang tura chahin Sihphir mipuite duhsakna a hlan a. Mihring hi in mamawh tawn theuh kan ni a, kan inhmangaiha kan induhsak lehzual te hi a pawimawh a ni, a ti bawk.

He hun remchangah hian Sihphir mipui zawng zawngte an zavaia chungah thinlung taka lawmthu sawiin an duhsakna avanga amah Sihphir pa ngei ram kalphung tur leh hmasawnna tur te, sorkar inrelbawl dan leh sum leh pai hman dan zawng zawng te reltu, ram rorelna sang ber kaihruaitu ni theia an siam hi a lawmawmin a ropui hle ani, a ti a. Khua, bial leh ram tan theihtawp a chhuah zel theih nan tawiawm tlat zel turin a ngen nghal a ni.