No.4424/2021-2022

Aizawl, 28th March, 2022 : Vawiin khan Thingsulthliah RD Block huam chhunga Mission Foundation Movement (MFM) hnuaia Organic Farming for Sustainable Agriculture Production Project beneficiary te hnena thlai chi leh bungrua hrang hrang semna hun chu Pu R. Lalzirliana, Minister chuan hmanpuiin, chemical fertilizer tello a thlai thar tura an hmakalna fakawm a tih thu a sawi. He project buaipuitu MFM Director Pu R. Vanlalzauva leh a thawhpuite inpekna chu chhuanawm a tih thu sawiin, ram vei mi tak, hmasawnna lamtluang zawh tura hmathlir tha tak nei mi Zoram in kan nei hi lawmawm a tih thu sawiin, Zoram mipuite tana malsawmna ni zel turin a chah bawk.

Minister hian Mizoram ah mithiam tam tak rawn chawr chhuakin Central a Ministry hrang hrang te dawr tur leh hmasawnna atana sum mamawh te paw chhuak turin Firm engemawzat din a lo ni tawh a. Amaherawhchu heng Firm ten an tum ber chu mahin inhaivur hmasak a nih fo avangin, a nih tur angin project kalpui a ni lo fo a ni. Chutiang ni lova, mahni inhaivur tur ni lo, Zoram kal siam tura MFM hmalakna chu a fakawm a tih thu a tarlang.

Mizoram, tui fim leh thianghlim tak luanna, ram dang tam takin an neih ve loh boruak thiang leh thlifim nuam tak lenna a cheng Zofate hian Ram ngaw kan thiah nasat avangin kan boruak te a inthlak nasa tawh hle a. Heng ti ziaawm tura Sustainable Organic Farming Project kalpui anni hi lawmawm a tih thu a sawi a. Thingsulthliah tlangdung a chengte hi an thlahtu te ata tawh mahni intodelh leh mahni kea ding thei deuh vek an nihna chu fakin, he Project helai tlangdunga kalpui a ni pawh hi inhmeh a tih thu a tarlang a. Vawiin thleng a Aizawl bazar thlai zawrh te pawh a tam zawk chu helai tlangdung a tharchhuah a nih thin thu a sawi.

Organic farming chungchang sawiin Minister chuan khawvel in a buaipui mek a nihzia a tarlang a. Ram changkang leh mi hausa ten Organic product an ngaih hlut zia leh ngaisan chhoh mek a nihzia a tarlang a. Hetihrual hian Chemical fertilizer te hmun hrang hrangah hman a lo nih tawh thin avang leh lui tui luang ten heng fertilizer te hi a ken darh ve thin bawk avangin Organic farming an kalpuina tur hmun te thlang fimkhur tur leh helai tlangdung in Organic Certificate an neih ngei theihna tur atan a dikna ngai pawimawh turin kalkhawm te a chah a ni.

Beneficiary thlan kawngah hleih nei hauh lo a mi taima leh a tak taka thawk thin thlan chhuah an nih hi lawmawm a tih thu a tarlang a. Tih tak takna nen chuan he Project hi a hlawhtling ngei a rin thu sawiin, mimawl te pawh ti fing thei Pathian chuan, taima taka an thawh rim na chu mal a sawm ngei a rin thu sawiin kalkhawmte a fuih.

Mission Foundation Movement hnuaia project kalpui mek hi Central Sector scheme niin 100% Central funding a ni a. He Project hi RD Block pahnih (2) Thingsulthliah RD Block ah leh Reiek RD Block ah te kalpui mek a ni. Thingsulthliah RF Block huamchhungah hian khaw hrang hrang pasarih (7) atangin beneficiary sawmsarih panga (75) te thlan chhuah an ni a. Heng beneficiary te hi MzSRLM hnuaia Self Help Group ti tha te atanga thlan chhuah an ni a, a thawh khatna ah hian thlai chi hrang hrang Sweet corn, Be, Vaimin leh Bawrhsaiabe bakah bungrua hrang hrang bawngtuthlawh, suahdur, tui pipe, chem leh pawisa fai Cheng 3000 theuh pek an ni.