No.4423/2021-2022

Aizawl, 28th March, 2022 : Vawiin khan Pu L.Thangmawia, Vice Chairman, HRD Board chuan Mizoram Mathematics Society (MMS), Mizoram Science, Technology & Innovation Council (MISTIC) leh Department of Mathematics, Pachhunga University college tena kar khat awh tur pawl 9 leh pawl 11 zir zo chiahte tana chhiarkawp zirhona runpui, Mathematics Summer Day Camp, 2022, Pachhunga University College Mathematics Department-a an buatsaih chu a hawng.

Hawnnna inkhawmah hian thusawiin Pu L.Thangmawia chuan Mizote pawh kan changkang chho zel a, Mathematics hi subject hara ngaihna la awm bawk mahse zirtirtute an that chhoh tak zel avangin a nihna dik tak kan hre chho mek zel a, zirlaite pawhin an chhiarkawp zirlaibu piah lam zir belh chakin Summer Day Camp, kum tina MMS in a buatsaih thinah pawh an tel tha thei hle tih hriat hi a hlimawm hle a ni a ti. Zofate zingah Science, Mathematics, Engineering leh Technology lama mithiam kan tam chho tan hle hi a lawmawm a, state dang leh khawvel huap thlir erawh chuan tan kan lak nasat a la ngai hle a ni. Vawiina zirlai taima lo kalte lakah Mizoram sawrkar chuan beiseina sang tak a nei a, in zirlai pui tam tak ten chawlh lai mahni nuam tih zawnga hman an thlak hlelh lai a chhiarkawp zir belh tura in sikul chawlh hun kar khat lai in rawn hmang peih hian hmalam hunah beiseina min neihsan tir hle a ni a ti a. Zirlaite zingah mahni leh chhungkaw tan mai ni lo, hnam tana zir kan tam a ngai a. Hna kan thawh hnu thlengin mahni tan mai lo, hnam tana thawk nih inhria kan tam chuan hmasawnna nasa zawk lo awmin eirukna leh zawmthawtna te a reh dawn a ni a ti. Zofate zingah Scientist leh mithiam kan awm nual ta hi thil lawmawm tak a ni a, tanlak zel erawh a la ngai hle a ni a ti.

Pu Thangmawia chuan zirlai tam tak ten Mathematics an hlauhna um bo tur leh zir belh duh ten an zir belh theihnana Mizoram Mathematics Society te thawhrimna chu fakin theihtawp chhuah chhunzawm zel turin a ngen a, a tih theih chinah theihtawp chhuahpui zel a tum thu a sawi bawk.

Pu Thangmawia chuan Mizorama Science leh Mathematics hmasawn nana MISTIC hnathawhte hi hmuhhmaih tum talh tan pawh hmuhhmaih thei a ni lo a ni a ti a. Science Society hrang hrang – MSS, STAM, MAS leh MMS te ngei pawh MISTIC zara hma nasa taka la thei an ni tih hi zoram mipui ten an hria a ni a ti a. Mizorama Science lam programme leh Science Journal zawng zawng deuhthaw hi an ni puihna zara neih thin a ni hi a lawmawm hle a, Tun hnaia he department hmalaknaa din belh, Patent Information Centre-te, State Climate Change Cell-te, Innovation Facility Centre-te, Scheduled Tribe Cell-te hi mipui tan an tangkai hle dawn a ni a ti.

Chief Minister Pu Zoramthanga pawhin a department chan hnuaia awm a nih angin Science leh Technology hi a ngai pawimawh hle a, hun rei lo te ah Department puitlinga Mizoram sawrkarin a hlan kai thuai a beisei thu a sawi bawk.

Mathematics Summer Day Camp 2022 hawnna inkhawm hi Dr L.P.Lalduhawma, President, MMS-in a kaihruai a. Pu David Rosangliana, Asst. Secretary, MMS in report a pe a. Prof Rinpari Ralte, Head, Deptt of Psychology, Pachhunga University College chuan Life Skill chungchangah special lecture a pe dawn bawk. He campah hian zirlai 59, class-IX zo chiah zirlai 24 leh Class XI zo chiah zirlai 35 an tel a, Mathematics an zir zelna tura pawimawh advance topic hrang hrang zir pui an nih bakah a duh tan Mathematics help Desk te siamin mahni duh ang zirlai tin ten a bik takin an zawt thei bawk dawn a ni.