No.4422/2021-2022
Dated Aizawl the 28th March 2022 (Monday) : ASEP-in a lo buatsaih thin ramngaw leh nungcha humhalhna kawng thawh hlawk te leh thlalakna hmanga thawkrimte chawimawina chu Dt. 28.03.2022 hian Aizawl Zoological Park-ah hman leh a ni a, Forest Minister Pu T.J. Lalnuntluanga chuan khuallian niin a hmanpui a. He hunah hian Environmental Photographer mi 4 leh Environment humhalh tha mi 1 hnenah chawimawina thuchei hlan an ni.

Chawimawina inkhawm programme hmanna hi ASEP President Pu K. Lamuansanga chuan a kaihruai a, Khuallian Minister Pu T.J. Lalnuntluanga chuan Mizorama Environmental NGO hlun berte zinga mi ASEP-in hetianga environment humhalhna lama chawimawi phute chawimawina a lo buatsaih thin chu lawmawm a tih thu a sawi a. “Environment humhalhna tura thlalakna hmanga hun leh tha, sum leh pai tam tak sengtute hi an fakawm a, kan ram mawina leh kan nungcha duhawm tak takte humhalhna kawngah an thiltih hi a ropui tak zet a. Ram leh hnam hmangaihna avanga environment humhalh tuichilh bur mai leh theihtawpa ke pentute hi chawimawi an phu tak zet a ni. Kan ram nuam tak hi thang leh thar lo awm zel turte tan chenna tlak ram nuam a nih reng theih nan theihtawp chhuaha humhalhtu ni zel turin Zoram mipuite pawh ka sawm tak meuh meuh a, he programme hian rah tha a chhuah zel ang tih pawh ka beisei tlat a ni,” a ti a. "Kan ramin a mamawh chu hmasawnna duh tak tak, an hriatna leh theihna eng kawng pawh hman tangkai duh leh rawtna hmun dik taka rawt mi kan mamawh a. Keimahah phei chuan rawtna hi lo thlen turin ka ngen cheu a, nungchate humhalhna leh Environment humhalhna kawnga hma kan sawn theih nan ka inhawng hle a ni" tiin khuallian chuan a sawi bawk.
He huna chawimawina hlante chu :-
(1) Pu Lalchhuanmawia Hnamte, Zemabawk
(2) Pi Z.D. Lalremthangi, Republic
(3) Pi Zothankhumi, Zuangtui
(4) Pu Francis Rosangliana, Ngentiang
(5) Pu C. Lalchhuanmawia, Chaltlang Lily veng