2238/2022-2023
Aizawl 7th October 2022: Vawiin tlai khan Power Minister Pu R Lalzirliana chuan Bawngkawn Badminton Club 2022 tournament kharna programme Hangi Lunglentlangah a hmanpui.

Pu R Lalzirliana chuan Bawngkawn Badminton Club in Mizorama lang tham, India aiawh pawha khel pha, badminton player tha an chherchhuak chu fakawm a ti a. India ramah chauh ni lo khawvelah pawh lang pha tura Mizo thalaite inbuatsaih turin a fuih. Tunlai thalai te infiamna lamah hma an sawn a, infiamna discipline hrang hrangah Mizo thalaite khelh theih loh a awm tawh mang lo, a ti a. Infiamna hi zu leh drugs laka fihlimna hmanraw tha a ni a, mahni inthunun theih hi a ken tel tlat avangin infiamna lama tuimi te tan sual kawng zawh a harsa bik, tiin Pu R Lalzirliana chuan infiamna uar deuh deuh turin Mizo thalaite a fuih a ni.

Bawngkawn Badminton Club hi kum 1973 khan din a ni a. Tun dinhmunah member 140 an awm mek. Bawngkawn Vengchhung mite bakah veng thenawm Zemabawk, Falkland, Chaltlang leh Edenthar atang te pawhin he club-ah hian an tel a ni. Tun tum tournament hi September ni 19 khan khelh tan a ni a, match 234 an khel a ni.

Tournament kharna inkhawm hi BBC President Er H. Lalnunzira’n a kaihruai a. An pawl Secretary Pu Zohmingliana’n report a pe a ni.