2239/2022-2023
Serchhip, 8th October, 2022: Nizan dar 7:00 khan Rural Development Minister Pu Lalruatkima'n Serchhip District DRDO Project Director quarters sak thar chu Khawtetlang, Serchhip-ah a hawng. RD Secretary Pu R. Zarzosanga, RD Joint Secretary Pi Irene Zohlimpuii Chongthu, RD Director Pu R. Lalthazuala leh Rural Development Department hotu dangte bakah Serchhip District-a sawrkar official pawimawhte, chanchinbumite leh khawtlang hruaitute he hunah hian an tel a ni.
Serchhip DRDO Project Director quarters hawnna inkhawm quarters tualzawla neihah Rural Development Minister Pu Lalruatkima chuan hun rei lote chhunga Serchhip DRDO Project Director's quarters hawn theih a ni ta chu lawmawm a tih thu a sawi a, quarters sakna tur hmun petu, quarters an neih hmaa rei tak lo keptu ni bawk Serchhip DC leh a thawhpuite chungah lawmthu a sawi bawk a ni.
Pu Ruatkima chuan Rural Development department hi Central Scheme-a innghat kan ni deuh ber a, District Rural Development Agency (DRDA) kan tih thin kha a sum min petu Ministry lamin state sawrkarin enkawl tawh rawh se a rawn ti a, State dang angin Zila Parishad kan nei ve si lova, mangang taka kan awm laiin State sawrkarah kan han thlen a, sawrkarin uluk taka a ngaihtuah hnuin District Rural Development Office min han ruahmansak ta a, sawrkar chungah kan lawm hle a ni, a ti a. DRDA a nih laiin a thawktu mi 92 chu court-in dah nghet turin min ti a, theihtawp kan chhuah chungin a hautak hle a, COVID-19 hripui len nasat hma khan an zinga 87 dah ngheh an ni ta a, hun a duh rei deuh avangin midang 5 erawh lo pension hman tawhte leh nunna chan ta te an ni a, kan tum ram kan thlenpui hman ta lo erawh pawi ka ti hle a ni, a ti.
Pu Ruatkima chuan RD Department chu District hmasawnna innghahna a nih avangin mipuite nena inngheng tlat a, hma la tlang reng tur an nih angin Serchhip DRDO hnathawkte pawh District mipuite nen thawhhona tha tak hnuaia hma an lak tlan a beisei thu a sawi a, kawng hrang hranga lo finchhuaha thurawn te lo pe thin turin kalkhawmte a chah a ni. Department hrang hrang official kalkhawmte pawh thawhhopuiah sawmin RD Minister chuan a theih apiangah hmasawnna hna kalpui hova, convergence a hmalak tlanpuiah a sawm a ni.
Serchhip DRDO Project Director's quarters hi MGNREGA material components atanga Rs nuai 95 senga sak a ni a. A project hming hi "Construction of DRDO Project Director's quarters at Serchhip" a ni a, DPO/DRDA hi implementing agency a ni. Thla 7 (18.7.2021 - 25.2.2022) chhunga sak zawh a ni. RD department engineer ten IS Code for Seismic Zone-V specifications anga an design a ni a, concrete structure atan hian Mix Design - IS Grade 15 (M-15) & Grade 20 (M-20) hman a ni a, Steel Reinforcement Design & bar bending zawng zawng hi IS 456 Design Specifications anga siam a ni.
Building hi floor thum sak niin, basement hi 77.18 sqm (830.5 sqft) a zau a ni a, ground floor leh first floor hi 135 sqm (1453.12 sq ft) a zau ve ve a ni thung.
Basement ah hian kitchen cum dining room 1, bedroom 1, common room 1 leh toilet cum bathroom 2 a awm a, ground floor ah hian kitchen cum dining room 1, bedroom 2, common room 1 leh toilet cum bathroom 3 awmin, first floor ah hian bedroom 2, common room 1, laundry 1 leh toilet cum bathroom 2 a awm thung a ni.
Nizan program hi RD Joint Secretary Pi Irene Zohlimpuii Chongthu-in kaihruaiin Pu Zoremthara Ralte, Deputy Secretary, RD department-in Technical Report a pe a, Pu Malsawmtluanga,PD DRDO, Serchhip chuan lawmthu sawinain hun a khar a ni.
Attachment
- Loading attachment...
