2240/2022-2023
Dated Serchhip, the 8th October, 2022: Vawiin khan Serchhip DC Conference Hall ah Faina Hapta, 2022 kharna inkhawm buatsaih a ni a. Pu Lalmuansanga Ralte, Addl. DC, bawrhsap mawhphurhna chelh mektu chu khuallian a ni.

Pu Lalmuansanga Ralte chuan, faina hi hriselna te, changkanna kawng tinreng nen a inzawm avangin a hapta chhung chauhva va uar ringawt tur kan ni lova, kumtluana kan nunpui reng tur thil pawimawh a ni. Serchhip mipuite pawh kan fai tawh em em a, hmuh theihin hma kan sawn a ni. Kan hriat angin India sawrkarin faina beihpui a rawn thlak hma kum 1977 atang tawh khan faina hi Mizoramah sawrkarin a lo kalpui tawh a, chumi zarah chuan state dangte nena khaikhin chuan kan ram hi a fai em em a, kan lo fin hmasak man kan tel chho zel a ni, a ti. Faina lama district chhunga Village Council hrang hrangte hmalakna fakin, an hnathawh thinte an hriatpui tih a hrilh a, kumin atang hian Serchhip chhunga Village Council 14 te chu faina lamah kum tluana an that dan indawta rem (ranking) an tum thu pawh a tarlang a. Kumin faina hapta atang hian bul kan tana, tuna Veng fai inelnaa vengtinte points score atang hian kan tehzui zel tawh dawn a ni, a ti. Hma lam pan tuma bei zel turin district mipuite a chah a, Mizote hian dan ang taka tum neia hma kan lak ve tawhnaah chuan India rama a tha ber pawl kan han ni ve thei zel a ni, hei hi i hrereng ang u, tiin a chah a ni.

Hapta kharna inkhawm hi Pu Lalrinsanga Hnamte, DUDO in a kaihruaia, Pu Samuel Lallawmzuala, Swachh Bharat Missions Grameen, Serchhip district Coordinator chuan hapta hman chhunga  veng fai inelna an endik dan report a pe a. Serchhip khawpui chhung a fai that thu leh mipuiten faina lamah nasa takin hma an sawn nia an hriat thu a sawi a ni. Pi RC Lalthianghlimi, MIS Coordinator, Swachh Bharat Missions Urban chuan hapta chhunga nitina hma an lak dan report a pe bawk. Cleanliness Week, 2022 thupui hi "Bawlhhlawh paih hmaa thliar hran" tih a ni.

Hapta chhung hian Serchhip khaw chhunga veng fai inelna buatsaih a ni a, lawmman dawngtute chu pakhatna Serchhip Vengchung, pahnihna Serchhip Kawnpui  leh pathumna Serchhip Field veng te an ni.
Mimal hma la thate chawimawina mi pali hnenah pek an ni a, a dawngtute chu Pu C. Laldinpuia, Serchhip Chhimveng, Pu Rohmingthanga, Serchhip Kawnpui veng, Pi PC Lianrengpuii, Serchhip Hmar veng leh Pi Lalrinmawii, Chanmari veng te an ni. Lawmman te hi khuallian hian a hlan a ni.