Pu R. Lalzirliana, Home Minister & Chief Patron MFA chuan vawiin khan Germany a Football zir tur Mizo naupang 17 leh Mizo Coach pakhat kum 4 chhunga a thlawna football zir turte a thlah liam. Thlahna hun hi I & PR Auditorium ah neih a niin Pu Lal Thanzara, I&PR Minister & President MFA in a tel pui bawk a, Pu Lalnghinglova Hmar, Honorary Secretary in inkhawm hi a kaihruai a ni.

Pu R. Lalzirliana chuan Germany a Football zir tur naupangte chu MFA te chungah lawmthu sawi tur an nih thu leh ram leh hnam tan an penchhuak a ni tih hre reng turin a chah a. MFA hruaitute hian Mizoram Football ti hmasawn tura an tha leh zung leh an theihna zawng zawng an hmang chu fakawm a tiin kan thalaite tan hmasawnna kawngah nasa takin an thawk a ni a ti.

Tunlai thangtharte hi an vannei hle a, a bika inzirtirna hmun a lo awm tawh mai bakah MFA hruaitute hmalaka a zarah India ram mai pawh nilovin khawvel hmun hrang hrangah Football khelin an chhuak tawh hi a lawmawm a ni, a ti a. Naupangte chu an thil zir te thiam tum tlat turin leh ram leh hnam leh an chhungte tan chhenfakawm ni tura theih tawp chhuaha chhel tak leh nun vawng tha turin Minister chuan a chah a ni.

Pu Lal Thanzara pawhin vawiin hi Mizoram Football tan ni chhinchhiah tlak tak a nih thu leh Mizo tlangvalte India rama club tha zawng zawng deuh thaw ah an tel tawh chu thil ropui tak a ni, a ti. Mizo naupang Germany a coaching nei turte chu tih takzetna rilru pu a harsatna hrang hrang karah thahnem ngai taka zirturin a fuih a ni. Dr. James Lalthansanga, Sr. Programme Officer, NEIDA (Tata Trusts) pawhin thusawiin Mizoram ah Tata Trusts hmalakna hrang hrang sawina hun a hmang bawk.

U Dream leh Tata Trusts hmalakna in Germany ah kum 4 chhung football zirturin India hmarchhak atangin naupang 35 leh coach 2 thlan chhuah te zingah Mizoram atangin naupang 17 leh coach 1 an tel a ni. Naktuk January 13 ah Kolkata panin chu ta tang chuan Germany ah an kal ang.