Vawiin hian Serchhip Bawrhsap Pisa-ah January ni 19 a Kuthnathawktute Ni, 2017 lo thleng tur hman dan tur; Bawrhsap Dr. Lalrozama, IAS hovin mi pawimawh ten an rel.

Dr. Lalrozama, IAS chuan, he ni hian pawimawhna a ngah hle a, sawrkar programme lian ber ber te hian kuthnathawktute lam a hawi deuh vek avang leh kan rama mipui tam zawkte hi kuthnathawktute an nih bawk si avangin a hlu bawk a, tangkai taka kan hman a ngai a ni, a ti a. Sawrkar in kuthnathawktute tana ruahmanna a siam hrang hrangte inhrilhhriatna atan te, infuih tharna atan te, hnathawk tha chawimawi tlakte chawimawina hun atan te pawh a remchang hle a ni a ti. Kuthnathawktute Ni hman dan tur atana NLUP Implementing Board (NIB) lamin ruahmanna a siam tlangpui a tarlang bawk a, chumi mil chuan Serchhip khawpuia hman dan tur pawh kalkhawmte hian an rel zui nghal a ni.

He ni hmanna hmun atan hian DC Conference Hall ruahman a ni a, a hun atan zing 11:30 a tan tura tih niin khuallian atan hian Information and Public Relations Minister Pu Lal Thanzara chu beisei a ni. Serchhip District chhunga NLUP hmalak dan report te, NLUP dawngtu hnathawktu hlawhtlingte thusawite, NIB lamin thupui a rawn thlan sa “Hah tak leh rim taka thawk chungin kan ei zawk a ni” 2 Thessalonika 3:8 hmanga thusawite, khuallian thusawite ngaihthlak a ni ang a. Zaithiam ten hun an hmang bawk ang.

Hengte bakah hian uar tak leh zau taka he ni hi hman a nih theih dan tur ruahmanna te pawh siam a ni a, sawrkar lirthei, NLUP Auto Rickshaw leh lirthei remchang apiangah Poster tar a ni ang a, khaw chhungah Banner leh Flag engemawzat tar a ni bawk ang. A hmanna inkhawmah pawh mipui a tam thei ang ber kal tura sawm an ni dawn a ni.

NLUP Implementing Board ruahmanna angin Serchhip District chhung khaw dang heng; Thenzawl, N. Vanlaiphai leh E. Lungdarah te pawh he ni hi hman tur a ni ang.

Vawiinah Meeting ah hian NLUP Line Department aiawhte leh AMFU aiawhte, leh sawm bik thahnem tak an tel a ni.