1333/2022-2023

Dated Serchhip, the 23^rd July, 2022: Nimin ni 22.7.2022 khan Power & Electricity Minister Pu R. Lalzirliana chuan Kau Tlabung Mini Hydro Electricity Project a tlawh.

Minister chuan, Kau Tlabung Mini Hydel Project chu hawn a nih ata vawiin thlenga tluang taka Power siam chhuak thei Power Station hlu tak a ni a, helaia hmalakna duhawm tak hi ka la tlawh loh avangin a hmunhma leh a dinhmunte hmuh ve hrim hrim ka chak a. Chubakah Electric siam chhuahna tur Mini Hydel Project thar dang siam turin sum leh pai a hautak hle a; Kau Tlabung Project hi tihlen theih a nih leh nih loh te, tun aia tui tam zawk khawlkhawma power tam zawkte la siam belh theih a nih leh nih loh te pawh hriata, a tul anga thuneitute nena hmalak zelna tlak a nih leh nih loh han en te kan duh bawk a ni, tiin he hmun a tlawh chhan a sawi a. Tuikhuah te, Tuikawng te, Power Station Rest House leh Power Generator dahna hmunte chipchiar takin a tlawh a. A hmunhma a en zawh hian Thenhlum khuaa cheng mek Pu C. Lalrinawma, kum 2004 chhova he Project tuikhuah hna thawktu chu a chenna inah kawmin an tuikhuahna bang innghahna (foundation) ngheh leh ngheh loh thute a sawi pui a. Thenhlum Power Sub Station a hnathawktute awmna tur quarters sak mekte pawh a en bawk a ni.

Kau Tlabung Mini Hydel Project hi kum 2005 May ni 5 ah khan khatihlaia Chief Minister Pu Zoramthanga'n a hawng a. Megawatt khat leh a chanve pe chhuak thei British siam khawl pahnih bunin a pahniha belh khawma Megawatt thum (3 megawatt) siam chhuak thei Power Station a ni. Fur tui tam vanglaia a pek chhuah theih sang ber chu 2.4Mw niin tunlai hian a mamawh zat tui a awm loh avangin 1.8Mw a siam chhuak mek a, thal khawro ber lai chuan 500Kw (Megawatt chanve) a siam chhuak thin thung.

Pu C. Lallawmsanga, SE, Transmission Circle chuan, Pu R. Lalzirliana'n fur khuaah a panna kawng pawh a that mumal loh laia inpezo taka an hmunhma a tlawh sak chu an lawm hle tih a tarlang a ni.