No.7930/2020-2021

Aizawl, 26th March, 2021 : Vawiin khan  Saitual District Research Officer's Office  chu  BNRGSK Hall, Keifang  Venghlun-ah P& E Minister leh bialtu MLA ni bawk, Pu R. Lalzirliana'n a hawng.

Hawnna inkhawmah Pu Zira  chuan tun hnaia district thar 3 lo piang te chu kum 1998-a district 5 hawn te nena khaikhinin an vanneiin hma an sawn chak hle a ni, a ti a.  Saitual district lo piannaah hian a paitu ngeiin  nau a hring hi a hlimawm tak zet a ni, tiin hemi atana Chief Minister Pu Zoramthanga  leh a sawrkar hmalaknaah lawmthu a sawi a.

Hmasawnna hna atan ruahmanna engpawh siam turin statistics leh data rintlak neih a pawimawhzia sawiin Pu Zira chuan Saitual district hawn tharah mipui hriat lar loh sawrkar department pawimawh tak, Economics & Statistics chu hma la hmasa department a nih avangin lawmawm a ti a. Saitual district-a DRO office pawimawhna chu hnathawktute an awm atang chiahin mipuiin an hre chiang dawn a ni, a ti.

Pu Zira chuan Saitual district thar hawn hnua sawrkar department hawn tharte zarah mipui pawhin hma an sawn ve tial tial dawn a ni, a ti a. National Highway kawngpui laih mek leh district nihna chuan kawng hrang hrangin mipuite tan hmasawnna kawng a hawng zau zel dawn a ni, a ti a. Chutih rual chuan Saitual district chu district dangte aia lian ber emaw, district hausa ber emaw nih tum lovin, district hlim ber nih tum zawk turin a chah a. Sawrkar hna leh sawrkar kutah innghat lovin, ram leilunga thil awmsa hmanga mahni intodelh a, faina leh thianghlimna kawngah te, hriselna kawngah te nasa taka tan la a, district dangte zirtirtu nih tum zawk turin a fuih a ni.

Pu Zira chuan Zofate zingah All India leh central service-ah te tling an tlem na chhan pakhat chu rual awh nachang hre lo  khawpin Zofate hi Pathianin min siam nuamsa a ni, a ti a. Rethei bakberh lutuka khawlaia cheng kan awm lo va. Kan ram hmasawnna leh hlawhtlinna te hi sorkar, kohhran, khawtlang leh mipuite tanrualna avang a ni tiin Mizo nun zemawi tlawmngaihna pawhin mual a lo la liam loh zia chu Covid hripui leng karah a takin a lo lang chiang hle a ni, a ti a. Ramri leh tualchhung venghim tura thalai te an duty dan te, pastor leh rawngbawltute pawhin theihtawp an chhuah dan te a ropui tak zet a ni, tiin hripui la leng mek lakah fimkhur zui zel a pawimawh zia a sawi bawk a ni.  

DRO Office hawnna inkhawm hi  Dr. Lalrinchhana Director, Economics & Statistics Department- in a kaihruai a. DRO office pawimawhna leh an hna thawh kalphung te a sawifiah a. Reilo teah DRO office chu pangngai taka kalpui a nih tur thu sawiin he office hawn a nih theihna tura nasa taka hma latu Pu H.Rammawi, State Planning Board Vice Chairman leh  Dr.C.Vanlalramsanga, Commissioner & Secretary Planning Department lo ni tawh, te chungah lawmthu a sawi a. Minister hi Pu T.C.Pachhunga ex-MLA, Vice Chairman, Sports Tourism & ICT Development Board leh Pu Rochhunga Ralte ex-MLA, Vice Chairman Land Revenue & Survey Board leh Saitual College Principal hmasa ber lo ni tawh bawk te’n an tawiawm a. Pu Rochhunga Ralte bakah Saitual D.C aiawhin Pu Daniel Sailo SDO (Sadar) leh Saitual Town Joint VC aiawhin  Pu Ramchhuanmawia, Saitual Venglai VCP ten thu an sawi a. Pu B.Lalrinhlua, Joint Director  Economics & Statistics Department in lawmthu sawiin hun hnung a khar a ni.

Vawiin chuan Saituala Soil Department office tur hmun tur pawh Pu Zira chuan a en kual nghal a ni.