No.7931/2020-2021

Kolasib dated 26th March 2021: Vawiin chawhma khan DC Circuit House, Kolasibah ruihhlo that lohzia inzirtirna ni pah fawma zirlaite tana lemziaka inelna, District Tobacco Control Cell, Kolasib buatsaiha titha zualte hnenah lawman semna hun hman a ni a, Pu Lallawmawma, Addl. DC chu khuallian a ni.

Khuallian Pu Lallawmawma, Addl. DC chuan ruihhlo chu ram leh hnam hmelma, thalaite hmantlak lova  siamtu a nih thu sawiin National Tobacco Control Programme, Kolasib district hmalaknaa ruihhlo that lohna inzirtirna leh zirlaite thiamthil haichhuahna ni bawk, Lemziaka inelna an buatsaih chu lawmawm a tih thu a sawi. Khawvelah finna leh thiamna kawngah hmasawnna nasa tak a awm mek thu Khuallian chuan sawiin chung hmasawnna tem pha ve turin leh thiamna leh finna thang mek pawl pha vetu nih tum turin an zirnaahte tan la a, ruihhloa fihlim tlat turin zirlaite chu a fuih bawk a ni.

Dr.Lalhlimpuia, Chief Medical Officer, Kolasib pawhin thu sawiin ruihhlo hmansualna chu zirlaite hmasawnna kawng daltu a nih dan te, nun titawitu leh chhungkua leh khawtlang tana mi hnawksak siamtu a nih dan te a sawi a, ruihhlo tel lova nun hmang turin leh mahni inrintawkna nei chunga an zirlaite hmachhawn thin turin a chah bawk a ni.

Lemziak inelna lawmman semna hun kaihruaitu, Dr.C. Vanlalhlimpuia, DNO (NTCP) chuan zirlai naupang kum 16-17 an nih chhohlai chu ruihhlo tihchhin chakna nasatlai a nih thu sawiin hemi hun chhung hi an fimkhura, ruihhlo laka fihlim tura tan an lak nasat a ngaihlai tak a nih thu a tarlang bawk a ni. Pi Vanlalchhuangi, President, MHIP Sub-Hqrs-in hunserh hmangin Pu ZT Vawra Hmar, District Consultant-in lemziak inelna buatsaih chhan leh endikna kalpuidan sawifiahna hun a hmang bawk a ni.

Lemziak inelnaah hian Kolasib district-a school 8 atangin zirlai naupang 31 an tel a. Vanlalrengpuii, Presbyterian English School chuan lawmman pakhatna lain, Lallawmsangi, St. Maria Goretti’s School chu pahnihna a ni a, Lalmuankimi, St. Maria Goretti’s School chuan lawmman pathumna a dawng bawk a ni. Consolation prize mi 5 hnenah hlan a ni a, inelnaa tel zawng zawngte hnenah lawmpuina thuziak pek vek an ni bawk.

Attachment

  • Loading attachment...