No.7932/2020-2021

Ngopa, 26th March, 2021: Rural Development Minister Pu Lalruatkima chuan vawiin chawhnu khan Ngopa BDO office tlawhin thawktute nen inkawmna hun an hmang.

Ngopa BDO Conference Hall-a inkawmhona hun buatsaihah Minister Pu Lalruatkima chuan RD Block hnuaia hnathawkte an thawhrimna fakin India ramah pawh Mizoram chu hnathawk tha zing a mi kan ni, a ti a. Kum kalta kumhnih chhung khan ni 100 inhlawhna kan siam thei a, kuminah pawh siam leh ngei kan inbeisei a, chhuanchham an awm lohna tura nasa taka thawktute an nih avangin Pathianin an inpekna pawh mal a sawm a ni, a ti a. RD hnuaia hmalakna chi hrang hrangah mipuite leh ram tana thawktu pawimawh ber zing a mi an nih avangin theihtawp chhuah zel turin a chah a. Shyama Prasad Mukherji Rurban Mission (SPMRM) hnuaiah RD Block 4 kan neih mek bakah Block dang khung belh leh turin sawrkar laipuiah dilna thlen mek a ni a, Block la bang zawng zawng 22 khung tura kan dil hi a hlawhtlin theih ngei nan theihtawp kan chhuah a ni, a ti a. Ngopa BDO hmalakna Damdiai Project (tuilakna) pawh an hawng thuai dawn tih a sawi a ni.

Ngopa RD Block hi kum 1974-a din a ni a, Ngopa RD Block huam chhungah hian khaw 13 - Ngopa, NE Khawdungsei, Chiahpui, Khawkawn, Mimbung, Teikhang, Hliappui, Saichal, Pawlrang, Lamzawl, Hrianghmun, Changzawl leh Kawlbem an awm a ni.

Ngopa BDO office ah hian Pu Vanlaltanpuia, MCS, BDO hovin thawktu 29 an awm mek a ni