Vawiin khan Art & Culture Minister Pu R. Lalzirliana chuan Lalit Kala Akademi, New Delhi leh Art & Culture Department tangkawpte buatsaih National Painting Camp hawnna programme Tourist Lodge ah a hmanpui a, National Painting Camp hi karkhat awh tur a ni.

Art & Culture Minister Pu R. Lalzirliana chuan lemziak mite chu thil chhut leh chik  mi ni a a hriat thu sawiin an kutchhuak mawi tak tak ten mihring rilru a hneh hle thin a, ngaihtuahna leh ngaihdan thar te mihring rilru an tuh fo thin a ti a. Art hian kan nitin nun nghawng lo mah se lemziak nalh tak han hmuh hian  rilru a ti hlim a, lawmna min pe a, chu chuan kan nunah thil tha tih duhna rilru min pe thei a ni, a ti.

Pu R. Lalzirliana chuan Lalit Kala Akademi, New Delhi in hun rei tak hnua Aizawl ah National Painting Camp an buatsaih leh chu lawmawm a tih thusawiin hemi chungchanga hma latu Lalit Kala Akademi, Regional Office Kolkata hmalakna te chu fakawm a ti a. Hun kal tawha Lalit Kala Akademi hmalakna leh ruahmanna katlangin Mizo lemziak thiam, thing ker thiam leh themthiam dang (craftsmen) ten an thiamna lamah hma an sawnin intuaihriamna hun tha tak an nei thin a, hetiang programme a tam zawk buatsaih leh huaihawt ani thei nan Lalit Kala Akademi thawhpui turin Art & Culture Department chu a in hawn reng thu a sawi a ni a. State hrang hranga atanga he National Camp a tel lemziak thiam 10 chuang te chu duhsakna hlanin, National Camp chhunga an kutchhuak ah Mizoram mawina te tilang a, Mizoram ti lar turin a ngen a ni.

Pu B. Lalhmingthanga, Secretary, Art & Culture Department chuan art in mihring nun a khawih dante sawiin mihring nunah art hian a tha zawngin hna a thawk thin a ni, a ti. National Painting Camp atana Lalit Kala Akademi in Coordinator-a an ruat, Shantiniketan University a, Prof. Janak Jhankar Narzary chuan Camp thil tum an programme an duan dan te a sawi a. National Painting Camp hawnna programme hi Pu K. Lalruala, Deputy Director, Art & Culture Department-in kaihruaiin Art & Culture Director Pu R. Hmingthanzuala leh Department officer leh thawktu dangte an tel a. Pu Rosiamliana Ralte, Artist leh Lalit Kala Akademi General Council Member ni bawk in lawm thu sawiin hun a har a ni.

Lalit Kala Akademi hi National Academy of Arts tih ani bawk a, fine arts hmasawn leh tihlar nan Sawrkar Laipui in 1954 a a din a ni a. Tum tun hi Aizawl a Lalit Kala Akademi in programme an neih vawi thumna a ni.