147/2023-2024

Dated Serchhip, the 19th April, 2023: Vawiin khan Pu R. Lalzirliana, Minister, Power & Electricity, Art & Culture, LRS&WC, etc., chuan Thenzawl Golf Course & Resort Convention Centre-a 48th Commercial Coordination Sub-Committee Meeting of North Eastern Regional Power Committee hawnna inkhawm chu khuallian niin a hmanpui.

Pu R. Lalzirliana chuan thusawiin, Electricity hi mitin mamawh thil pawimawh a nih avangin Power Supply hnianghnar neih hi kan mamawh em em a. Mizoram sawrkar pawhin mipuite mamawhna phuhru turin power siamtu Company te nen indawrna a kalpui reng a, kumtin power supply engemawzat kan lei thin a ni. Heng power kan leina sum leh pai pek thuah hripui vangten harsatna te kan han tawk ve bawk a, mahse tunah chuan hripuite a lo kiang a, power man pek thuah nasa lehzualin kan insawrbing thei ta a, hma pawh kan sawn a, theihtawp kan chhuah chho zel a ni. Green Energy siam chhuahna lamah India sawrkarin nasa takin hma a la tih kan hre hlawm a, National Green Hydrogen Mission tihhlawhtlinna kawngah India hmarchhaka kan Engineer ten ruahmanna leh hmalakna tha tak tak in neih ngei ka beisei a ni. Hetiang hmalakna lamah hian NE states te pawhin thil tam tak kan tithei a ni tih i hria ang u. Mizoram hian 29.35 MW siam chhuahna Hydel Power Plants kan nei thina, nikum mai khan Tlawva 5MW leh Kawlbem 4MW kan neih belh a, Solar Power plant hi Tlungvelah 2MW siamna kan nei tawh a, 20MW siam chhuak Vankalah kan nei fel leh tawh bawk a, hei hi tun thla ni 25 hian kan hawng dawn a ni. Tin, 10MW Solar Plant thar pahnih, Keifang ah leh Thenzawlah din tum mek a ni bawk. Hydel Project pawh hi engemawzat kalpui mek kan nei a, a bikin tunah hian 24MW pe thei tur pahnih Tuivawl ah leh Tuirini ah Mizoram sawrkar a insawrbing mek a. Tin, CPSU hmalaknain Mat Sekawi 76MW pe thei tur leh Koladyne-II, 460 MW pe thei tur bawhzui mek reng a ni bawk, tiin Mizoram sawrkar inbuatsaihna tlangpui a tarlang a ni. Minister hian hmun hrang hrang atanga palai lokalte hlim tak leh hlawk taka in hunte hmang turin duhsakna ka hlan cheu a ni, tiin Minister hian duhsakna a hlan a ni.

Er Lalhmingliani Hmar, E-in-C, P&ED chuan palai lokal te lawmna thu sawiin, kum 1962 ah Mizoram ah a hmasa ber atan kan khawpui ber Aizawl chuan Power Supply a hmu ve tan a, Diesel Generator hmanga siam a ni. Chuta tang chuan hma sawn zelin vawiinah chuan khaw 725 ah Power hi lakluh tawh a ni, tiin Mizorama Power Supply luh tan dan leh tun dinhmun tlangpui a tarlang a. Kuminah he meeting pawimawh tak Mizoramin kan thleng leh thei hi kan lawm hle a, kum 2015 ah khan kan lo thleng tawh a ni. India hmarchhak ramten power kan in leisak leh inhralh tawnna lama sawi ho ngai kan neih ang ang te inpawh tlang taka sawi hona hlawhtling tak neih ngei kan tum dawn nia. State hrang hrang aiawh leh Corporations aiawh lokal te chungah lawmthu kan sawi tak meuh a ni, a ti. He hunah Pu Nabarun Roy, Executive Director, NERLDC te, Pu SM Aimol, Director, NERPC leh Pu K.B Jagtap, Member Secretary, NERPC ten thusawina hun an hmang bawk.

He hunah hian NE States hrang hrang atanga Power & Electricity Department aiawhte, North Eastern Regional Load Despatch Centre aiawhte, NEEPCO aiawhte, Powergrid Corporation of India Limited aiawhte leh NTPC aiawhte an tel a ni.

North Eastern Regional Power Committee hnuaia Commercial Co-Ordination Sub Committee hi Power lei leh hralh chungchanga NE States hrang hrang leh Corporations te indawr tawnna committee pawimawh tak a ni.

A hawnna inkhawm hi Er Benjamin L. Tlumte, SE (Control), P&E Department chuan a kaihruai a, Er Lalbiaksanga, CE(Distribution) chuan lawmthu sawiin hun a khar a ni.