148/2023-2024

Champhai, the 19th April, 2023: Ruihhlo leh a kaihhnawih hrang hrang laka India ram a fihlim theihna tura sawrkar laipuia Ministry of Social Justice & Empowerment leh Mizoram State Social Defence & Rehabilitation Board-te tangkawp hnuaia National Action Plan for Drug Demand Reduction (NAPDDR) hmalakna, 'Nasha Mukh Bharat- Drug Free India Campaign' kalpuitu District Level Nasha Mukt Bharat Abhiyaan Committee, Undivided Champhai District chu vawiin chawhma dar 11 khan Champhai District Bawrhsap Pu James Lalrinchhana, Chairman, District Level Nasha Mukt Bharat Abhiyaan hovin DC Conference Hall-ah an thukhawm.

District Bawrhsap Pu James Lalrinchhana chuan ruihhlo thahnem tak man a ni thin leh halral a ni chung pawha ruihhlo a hluar zel leh, a zalen lutuk chu ngaimawhawm a tih thu sawiin, Champhai District chu ruihhlo tawlhruk kalkawng leh heng zinga engemawchen thlauhthlak a nihna hmun a nih avangin kan ngaihthah thiang lova, kan District mai nilo India rama ruihhlo tawlhluh vengtu gate keeper pawimawh tak kan ni a, lungrual taka kan tan tlan zel a tul a ni, a ti a. Ruihhlo chuan thalai hnathawk rualte hriselna a tichhia a, hnathawk thei lova siamin ram leh hnam hmasawnnain a tawrh nasat phah hle a ni, a ti a. Kalkhawmte chu ruihhlo hman sual ven kawngah hmalakna tur kalphung thar leh hmasawnna thlen thei tur angte ngaihtuaha theihtawp chhuah turin a sawm a ni.

Member Secretary, Nasha Mukt Bharat Abhiyaan, Champhai District Pi PB Liansangpuii, Coordinator, Mizoram Social Defence & Rehabilitation Board, Social Welfare & Tribal Affairs Department hnen atangin report ngaihthlak a ni a. Ruihhlo ngaite enkawl kawnga awmze nei zawka hmalak a nih theih nana program duang tura din Sub-Committee aiawhin Pu C.Lalremliana'n zirchianna an neih atanga rawtna awmte a tarlang bawk.

He hunah hian NMBA District Master Trainer 2 te kaltlanga Zirna In-a training kalpui dan tur chungchangte ngaihtuah a ni a. Poster/hoarding tam zawk kalpui tura ruahmanna awmte leh kalpui dan turte sawiho a ni a. Ruihhlo ngawlvei enkawl leh chhanchhuah kawnga hmalak mai bakah ti tan tirte buaipui kawnga tanlak tulzia te, a la khawih ve lote hnena inzirtirna pek tam a pawimawh dante sawiho a ni bawk.

Nasha Mukh Bharat Abhiyaan- Drug Free India Campaign hnuaiah hian India rama District 272 ahte ruihhlo do hmalakna kalpui hmasak a ni a. Nikum August thla khan District 100 dang telh belh leh a ni a, tun dinhmunah District 372 ah kalpui mek a ni. Aizawl, Kolasib leh Champhai District-te chu Mizoram atanga he campaign kalpuinate an ni a; Narcotics Control Bureau (NCB) leh Ministry of Social Justice & Empowerment kaltlanga National Survey neihin drug hluarna District nia a tarlan zulzuia thlante an ni.

NMBA kaltlang vek hian vawiin chawhma dar 11 khan Govt. Champhai College Anti-Tobacco Club leh Govt. GM Higher Secondary School Zirlaite tan Govt. GM HSS ah Anti-Tobacco Squad-te'n Awareness Campaign & Drive an nei a. Thupui thlan bik pathum; 'Engvanginnge zuk leh hmuam kan tih', 'Zuk leh hmuamin thalai nun a nghawng dan' tih leh 'Kan ramah zuk leh hmuam engtinnge kan tih tlem ang' tihte chu zirho a ni a; he hunah hian mi 60 an tel thei a ni. Heng bakah hian Zirna In leh a chehvelahte pawh endik niin inzirtirna an nei pah nghal bawk a. Ruahman dan chuan NMBA kaltlangin tunkar chhungin ruihhlo ngaite tan Free Health Camp buatsaih tum a ni bawk.