Vawiin chhun khan SIRD ( State Institute of Rural Development) Durtlang Leitan thlanglawka building sak mek chu Pu R. Lalzirliana, Rural Development Minister in a tlawh a. Parliamentary Secretary Col. Z S Zuala; Pu T Sangkunga MLA leh Official pawimawh ten an tawiawm.

SIRD building hi sak zawh mek a ni tawh a, luah theih anih hun ah chuan IAS Coaching Centre atana hman a remchang thei ang em tih te rel hova thlir ho a ngaih thu sawiin Pu R. Lalzirliana chuan tum anga kalpui zel theih anih chuan tun thla ni 18 hian E TEN IAS, Delhi atangin Pu Manav Agarwal a lo kal anga, MoU te sign theih nghal anih a beisei thu a sawi. He lai hmun hi Soil Department ho ram a ni a, SIRD building sak mek hi kum 2011 atanga sak tan a ni, Mizo pa chhiara chhawng nga, in lian tak a ni. Sum lam awm loh leh remchanlohna thenkhat awm avanga khaihlak deuh hlek hnu in kumin hian chhunzawm leh mek a nih thu sawiin kut hnathawktu ten tangkai taka an hman theih dan tur tinzawn chung leh Science leh thildangah thalai te inzir chhuahna tur anih beisei in hetiang SIRD building hi Director thutchilh in Kolosib ah te, Thingsul leh Pukpui ah te sak zawh a lo nih tawh thu a sawi bawk.

SIRD Building Durtlanga sak mek hi North East Consultancies Services sak a niin Staff quarter bakah Conference Hall tha tak tak pathum, Guest House leh VIP thlenna tur te a bul velah hian sak zawh mek a ni bawk.