Pu R. Romawia, Minister Land Revenue & Settlement, Higher & Technical etc chuan vawiin khan Mamit a tlawh.

Pu R. Romawia hi Mamit a Independence Day lawmna a khuallian tur niin vawiin khan Govt Mamit College, Land Revenue & Settlement Office Mamit leh Women Polytechnic sak mek te a hmunah a tlawh nghal a ni. Govt Mamit College a tlawhnaah hian Minister chuan College hmunhma te enpuiin hmalak mekna te sawi ho a ni a, zirtirtute tunlai khawvel in elna sang tawh takah zirlai ten hlawhtlinna an hmuh ngei theih nana thahnemngai taka thawk turin a chah a. Zirtirtu mamawhna te uluk taka ngaihtuah thin a nih thu sawiin zirlai awmzat milh leh sum dinhmun mil zela hmalak a ni.

Land Revenue & Settlement Office, Mamit a tlawhna ah hian Minister Pu R. Romawia chuan ram hi a hlu a ni tih hria a, Revenue Department hnathawktute chu duham lo, fimkhur uluk taka hna thawk a, ram teh thin turin a fuih a ni.

Naktuk dar 10:00 hian Mamit GSA Playground-ah India Zalenna champha lawmna ah hnam puanzar a pawtpharh dawn a ni.