Vawiin khan District Institute of Education & Training (DIET), Champhai chuan Diploma in Elementary Education (D.El.Ed) Training programme a tel tur zirtirtu 74 lawmluhna hun a buatsaih a; he hunah hian Champhai DC Pu H. Lalengmawia chu khuallian niin, Pu RL Thianghlima, Principal, DIET Champhai chuan hun hi a kaihruai a ni.

Khuallian chuan zirtirtute chu naupangte entawntlaka nun an uluk a pawimawh thu sawiin, naupangte enkawl danah pawh thlei bik neilo turin a chah a. Mahni hna thiam ringawt a tawkloh thu sawiin, hna a tuina tak tak neih pawimawh thu a sawi tel a. Mizoram chhung ringawtah pawh zirna in a awm tam thu ngaihtuahin, duhthusam a tam mithiam chhawrtlak an tam loh avangin zirtirtute mawhphurna a sang hle a ni, a ti a. Training tur te pawh zirtirtu mi puitling kalkhawm an nih avangin an training programme chu lecturer te sawi ringawt rin tum lova, interactive takin class te kalpui tura a duh thu DC Pu H. Lalengmawia chuan a sawi bawk.

Hun kaihruaitu Pu RL Thianghlima chuan kum 2004-a Teacher Education Approval Board (TEAB) meeting-in "Telescoped DIET/ Mini DIET" atan din phalna a pek hnu ah kum 2012 a DIET puitling ah hlankai a nih thu a sawi a. Pu C. Rodala, District Education Officer; Pu C. Lalbiakzauva, Sub-Divisional Education Officer, Champhai leh Pi K. Lalsiamliani, DPC (SSA), Champhai ten In-Service Teacher Trainee-ten an hriattur pawimawh thu vawiin hunah hian an sawi bawk a. Pi Hnamte Rebecca Lalbiakdiki hnen atangin DIET Champhai chungchang ngaihthlak a ni bawk.

Kumin In-Service Teachers' Training batch hnihna (2015 - 2017) tur te hi Primary Section ah mi 19 awmin, Middle Section ah mi 55 an awm a. Kum 2014 - 2016 chhunga ISTE Batch hmasa berah khan Primary Section zirtirtu 65 leh Middle Section zirtirtu 46 ten training an kal mek bawk a. ISTE bakah hian IGNOU hnuaiah 2014 (January) batch mi 96 leh 2014 (July batch) mi 65 an awm bawk.

Vawiin programme-ah hian Champhai District chhunga Education Department hnuaia officer-te bakah Champhai Middle School Teachers' Association leh Primary School Teachers' Association hruaitute an tel bawk a ni.