Pu R. Romawia, Art & Culture Minister chuan vawiin khan 6th Librarian Day, Chanmari YMA Hall a neih chu a hmanpui. Pi Thanhliri Pachuau, Secretary, Art & Culture chu khual zahawm niin lawmna inkhawm hi Pu R. Hmingthanzuala, Director, Art & Culture in a kaihruai a. Librarian Day hi Library lama sulsutu Pu S.R. Ranganathan piancham denchhena hman thin a ni a, Mizoramah pawh Librarian Day hi vawi 6 hmanna a ni. Kumin hi Pu S.R. Ranganathan piancham kum 114 na a ni.

Pu R. Romawia chuan Librarian te hian thahnem ngai taka mipuite lehkhabu chhiar peih tura zirtirna pek a pawimawh zia hre thar turin leh Librarian te hi nakin hun rahbi tuk tu te an ni a, thangtharte chhiar peih tur lehkhabu ngaihtuah thiam turin a chah a. Kan Library ah te hian mi thahnemngai ten lehkhabu te an lo donate thin avangin lehkhabu rotling tak tak kan nei a ni Minister chuan tiin vawiin Librarian Day ah hian Library tun aia tangkai zawka hman a nih theih nana ngaihtuahna hmang thar turin hmun hrang hranga Library enkawltute chu a chah bawk.

Pi Thanhliri Pachuau chuan Library pawimawh zia sawiin Library hman tangkaia khawltlang leh ram hmasawnna atan tanla sauh sauh turin Librarian kalkhawmte chu a chah bawk. Prof. R.K. Ngurtinkhuma, Head, Library & Information Science Deptt., MZU chuan Library nei tha tura Librarian te pawimawhna tih thupui hmangin paper a present a ni.

Mizoram State Library hi Art & Culture Department enkawlna hnuaia awm a ni a. Kum 1974 ah din niin New Secretariat Complex, Khatla-ah building hran neiin Library hi a ding mek a. Library House-keeping activities (Cataloguing, Circulation) te hi LIBSYS Software hmanga computerised vek a ni. Librarian Day hi 12th August ah hman thin a ni a, hemi pual hian Library a lehkhabu chhiar tha naupang leh puitling hnenah lawmman sem thin a ni a.

Vawiin hian Best Reader’s Award Mizoram State Library & District Library, Aizawl atangin Mizoram State Library naupang zingah : 1) Lalnuntluanga s/o Joseph Lalremmawia, Tuikhuahtlang; 2) Lalnunmawii d/o Joseph Lalremmawia, Tuikhuahtlang; 3) P.C. Zoremsanga s/o P.C. Lalduhawma, Tuikhuahtlang ten lawmman hi an la a. Aizawl District Library puitling zing ah : 1) Lalnunpuii d/o P.K. Thawnga, Tlangnuam; 2) Ramzauzeli d/o Lalhliapa, Kulikawn; 3) Penticos Thanga s/o Laibata, Tlangnuam ten lawmman hi an la bawk.