Pu R.Romawia, Speaker Mizoram Legislative Assembly chuan vawiin khan ICFAI Foundation Day cum Freshers’ Social a hmanpui. He inkhawm hi University Auditorium, Durtlang-ah neih a ni.

Pu Romawia chuan he hun hmanpui tura an sawm chu lawmawm a tih thu sawiin hetiang zirna hmun a awm chu a vanneihthlak a, chhawr tangkai thiam turin zirlaite chu a chah. Zirlaite chu lehkha zir peih a, eizawnna tlak atan leh ram leh hnam tan zir turin a fuih bawk.

ICFAI hotute chu Aizawl leh Lunglei ah chauh zirna hmun bun lova district dang ah pawh zirna In hi bun ve turin a chah. ICFAI University Mizoram report hrang hrang ngaihthlak anih bakah zirlai lut thar te lawmna hun hman a ni. He University ah hian course hrang hrang BBA,BCA, BHTM leh MBA ah te hian zirlai 400 chuang lai an awm mek a ni.

Zirlaite hi thiamna tak tak nei tura kaihhruai an ni a, zirtirna pawh a practical thei ang bera kalpui a ni. Kum tin Industrial Tour neihpui thin an ni a, hei hi Company lian leh changtlung tak tak hnathawh dan leh hmunhma te an hriat thiam theih nana a neih a ni. Zir chhuak tawh mi 180 chuang awmin heng zinga thenkhatte hi Mizoram bakah India ram hmun dang ah te hnathawk leh zirna sang zawk beiin an awm hlawm a ni.

He hun hi sorkar hotute leh mi pawimawh dang engemawzatin an hmanpui.