NLUP Implementing Board Chairman Pu R.Selthuama, MLA hovin vawiin chhun dar 11 khan Agriculture Directorate Committee Room ah Mamit District huam chhung bika NLUP thawh hnihna leh a hnulam zel atana beneficiaries thlan dan tur leh trade tih fel dan tur te an sawi ho a.

Meeting ah hian Mamit Deputy Commissioner te, Directorate leh Mamit District-a Line Department Nodal Officer te an kalkhawm a ni. Meeting ah hian Mamit Deputy Commissioner Office-a Nodal Officer leh Line Department Nodal Officer ten an department chanpual theuhva hma an lak dan leh dinhmun te leh beneficiaries te hnathawh dan te report an pe a. A tlangpuiin beneficiaries te hnathawh danah lungawithlak an tih thu te an tarlang a, mi tlemte erawh an hmalakna duhkhawp lovin instalment pek chhunzawm lohva enthlak mek an nih thu te an sawifiah. Mamit District ah hian a pumpuiin tunah Beneficiaries 3,872 an awm a, NLUP thawh hnihna (2nd Phase) ah chuan Beneficiaries 3,950 thlan tura ruahman a ni. Department tin hnuaia Beneficiaries leh Trade thlan fel chungchang chu District Implementing Committee Chairman / Deputy Commissioner hova la tih fel tura dah a ni. Nodal Officer ten harsatna hrang hrang an tawh te sawihovin Village Level Monitoring Committee ten endik hna an thawhnaa sum senso phuhrukna tur pawh bawhzui mek a nih thu te an inhrilhfiah a, NLUP tanpuina dawngtu ten an thawk tha lo a nih chuan party zawnga inen theih a nih tawh loh thu sawiin Chairman Pu R.Selthuama chuan beneficiary thawk tha leh thawk tha lovah thliar mai tur niin a tul anga hremna pawh lek kawh mai tur a nih thu te a sawifiah a. District lama kuthnathawktu te awmchilhtu department nodal officer te chu NLUP hlawhtlinna tura a pawimawh ber in ni tiin Pu R.Selthuama chuan NLUP dawngtu te chu thahnemngai taka fuiha kaihruai zel turin a fuih bawk.