Vawiin khan Higer & Technical Education Minister Pu Lalsawta, State Level Quality Assurance Co-ordination Committee Chairman, hovin Mizoram College hrang hrang Principal te leh Quality Assurance Cell(QAC) Coordinator te chuan “The Role of Internal Quality Assurance” tih thupui hmangin I&PR Conference Hall- ah zirna siam that chungchang sawihona meeting an nei a. College hrang hrang a QAC ten zirna siam tha tura an hmalakna te report an pe.

Pu Lalsawta chuan khawvel thiamna intlaksiakna nasa tak karah zirna tih that pawimawh zia hi sawi uar lutuk a awm thei lovang, a ti a. Tun hma huna hna hmuh nan degree neihin kawngro a su ang kha ni tawh lovin tunah chuan public leh private sector ah pawh chhawr tlak thiamna neih a tul tawh vangin zirna in ten quality an tih that hi a tul tak zet a ni, a ti.

Meeting hi H&TE Director Dr.H.L.Malsawma’n a kaihruai a. Kum 2010-2011 chhunga College titha thlan chhuah 3 hnenah Minister chuan Best Practices Award 2011 a hlan a; chungte chu Pakhatna - Govt.Hrangbana College, Pahnihna - Govt. Aizawl College leh Pathumna - Lunglei Govt. College te an ni.

Tun ah hian H&TE hnuaia college zawng zawng te chuan University atangin affiliation nghet an nei vek tawh a. Directorate of H&TE hnuaia college tin te chuan UGC pawmpuina 2(f) leh 12(b) an nei vek tawh a. Mizorama college 19 te chuan accreditation an nei tawh bawk a ni.