Assembly Speaker Pu R. Romawia chuan vawiin khan Kolasib Diakkawn Hall-ah NLUP 2nd Phase 2nd instalment trade hrang hranga NLUP dawngtute hnenah a sem.

NLUP semna inkhawm hi Pu R. Lalramnghaka, KolasibDC chuan a kaihruai a. Khuallian Pu R. Romawia chuan thu sawiin, Sawrkar chuan mirethei leh Kut hnathawha eizawngtuten eizawnna ngelnghet an neih hi a duh leh a tum ber a ni a. Hemi atana a tihtur chu a tizel dawn a ni, a ti. NLUP hi development programme a nilo tih kan chiang a, mi harsate khai chhuahna programme liau liau a ni a. Amaherawhchu, he policy hlawhtlinna hian development programme a hring chhuak thei a ni, a ti.

Speaker chuan NLUP hian Mizoram chhungah rah duhawm tak a chhuah mek zel a ni, tiin Kolasib District chu ram tha, Leilet zawl leh leilung buhbal ngeih chi, sik leh sa pawh thlai ten an ngeih zawng tak kawltu (potential area) nei tha tak a ni, a ti a. A mi chengten thawhrimna nena tan in lak chuan Zoram Buhzem la ni thei hial tur in ni, a ti a. Power lamah pawh Serlui B leh Tuirial Hydro Electric Project te in nei a, in vannei hle a ni, a ti a ni. Leilet hmuna Vai kan chhawr chiam thin erawh hi chu khuareia Mizote min chimraltu anla nih theih dawn avangin chutiang kua chu an hreuh lohna turin kan ngaihtuahna pawh thui tak kan sen a tul a ni, Pu R. Romawia chuan a ti a ni.

Pu R. Lalduhawma, Member, NLUP Apex Board pawhin thu sawiin Sawrkar chuan kut hnathawktute eizawnna tur hi a ngai pawimawh em em a. Tuna kalpui a nih dan hi a changtlungin a felfai hle a, a chhuanawm hle a ni. Kan Chief Minister hian a hlawhtlin loh a hlau em em a, tun atanga kum 5/7 velah chuan Zoramin a hlawhtlinna hi kan hmu dawn a. Midangte thik thama kut hnathawkte ngaihsak an ni hian he NLUP hi a ti chhuanawm lehzual a ni, tiin nasa taka tang turin NLUP dawngtute chu a fuih a ni.

NLUP semna inkhawmah hian trade hrang hranga beneficiary 5 zel hnenah khuallian hian Cheque a sem a. A dang chu a hnuah Deptt. lamten an sem zui a . Khaw dangah pawh naktuk lamah sem chhunzawm a ni dawn a ni.