Vawiin chawhma dar 11:00 khan D.C's Conference Hall, Saiha-ah Saiha District chhunga N.L.U.P. Beneficiaries te hnenah N.L.U.P. 2nd phase- a 2nd Installment sem a ni.

He N.L.U.P. semna inkhawmah hian Pu S.Hiato, Minister i/c Industries etc,. chu Khuallian niin, Pu R.T.Zachono, C.E.M., M.A.D.C. chu Khualzahawm a ni. Pu N.Chakhai Addl. Deputy Commissioner, Saiha District inkhawm kaihhruaiah Rev Dr M.Zakonia'n hunserh a hman zawh hnu in Khuallian chuan thu sawiin sawrkar Flagship Programme NLUP hi mirethei leh hnuaihnung lei rem rap pha tawh lo ten leirem an rah leh theih nana sawrkar in a duan a ni a, a hlawhtlinna chu a dawngtu te kutah a in nghat a ni, tiin a dawngtu te chu an dawn chhan ang ngeia tih hlawhtlin tum theuh turin a chah a, tihtak zeta thawktu te chu sawrkarin a tanpui zel tur thu a sawi bawk.

Vawiina N.L.U.P. semna ah hian Beneficiaries 70, Line Department hrang hrang pasarih (7) atanga mi 10 theuh thlanchhuahte hnenah N.L.U.P. sum hi sem chhuah a ni a. AH & Vety Department hnuai mi 10 Vawkvulh thlangtu te hnenah Rs 20,000/- theuh sem a ni a, Soil & Water Conservation Department hnuaiah mi 5 Coffee chin thlangtu te hnenah Rs 39,700/- leh mi 5 Hmunphiah hmun siam thlangtu te hnenah Rs 27,280/- pek an ni bawk. Divisional Horticulture Department hnuaiah mi 3 Pineapple chin thlangtu te hnenah Rs 22,000/- theuh pek an nih bakah mi 7 M.Orange chin thlangtu te hnenah Rs 26,500/- theuh pek an ni bawk. District Industries Department hnuaiah mi 10 Trade hrang hrang thlangtu te hnenah Rs 47,000/- theuh pek an ni a, District Agriculture Department hnuaiah mi 10 WRC-II thlangtu te hnenah Rs 20,000/- theuh pek an ni bawk. District Fisheries Department hnuaiah mi 10 Sangha khawi thlangtu te hnenah Rs 8,000/- theuh pek an ni a, District Sericulture Department hnuaiah Pangang khawi thlangtu mi 10 te hnenah Rs 25,528/-theuh pek an ni bawk.