Vawiin khan Pu R.Romawia Higher & Technical Education Minister chuan Vanapa Society ten an din Mizoram College of Social Sciences ( MICOSS ) a hawng.

Mizoramah College hrang hrang a awm tawh chung in zirlai tam tak te chuan Aizawl khawpui ah ngei zir chhuah duh in Aizawl lam an bawh a, college in a daih loh avangin zirlai tam tak te chuan seats an chan loh thin thu leh college thenkhatah te phei chuan in ek beng a ngaih thin thu khuallian Pu R.Romawia chuan sawiin tunah mi thahnemngaiten zirna tur college tha tak an lo sual chhuak chu lawmawm a tih thu leh Private Colleges te hi Aizawl ah hian ding zel thei se,chu chuan zirtirtu leh zirlaite ah inelna tha tak hring chhuak thei se,zirlai naupangte tan pawh a that a beisei thu a sawi.

‘I Pianna ramah kir leh rawh ‘ tih thu hi Mizoten kan hriatreng a pawimawh a ni tiin Pu R.Romawia chuan Pathianin talent tha tak min pe a, kan thiam kan finna te hi kan ram leh hnam chhanchhuah nan leh hmasawnna atana hmang tangkaiin tumruhna,taimakna leh dawhtheihna te nen kan pianna ah kir in mi chhenfakawm ni ngei turin zirlaite chu a chah a,MICOSS a thawk zirtirtute pawh fuihin Minister chuan a tirah naupang tha leh thiam thei an awm nghal lo mai thei,mahse beidawng mai lovin college tha leh hlawhtling ah an chhuah thei a ni tiin duhsakna nen MICOSS chu a hawng a ni.

Vawiin programme hi Pu K Lalhruaia Principal MICOSS in a kaihruai ah hian khual zahawm Prof.R.L. Thanmawia Controller of Examination,Mizoram University pawh in thu a sawi a ,Pu C Lalhriatpuia, Vice Principal in Technical report a pe a ni.MICOSS hi kumin July thla atanga din a niin 20th July,2015 ah class lak tan nghal a ni a, zirlai pawh engemaw zat an awm tawh a ni. MICOSS hian anmahni puala hmun an la neih loh avangin tunah chuan JL Higher Secondary School, Khatla an hmang mek a ni.