Vawiin chawhnu khan Urban Development & Poverty Alleviation Department chungchanga biakrawn tura din Consultative Committee chuan UD&PA Minister leh he Committee Chairman ni bawk Pu Zodintluanga hovin a pisaah an thukhawm.
Kumin kum tawp lama Aizawl Municicpal Council pahnihna inthlan neih turah State Election Commission chuan hmeichhe tana seat hauh chungchang leh Mizoram Municipality Act, Section 13 (7) & (9) in a tarlan ang SC leh ST tana seat hauh chungchangah Consultative Committee a rawn a. 2001 chhiarpuiah SC population hi 1% aia a tlem avangin 2010 a Committee khan ‘NIL’ angin a lo dah tawh a, Election Rules thar ber angin permanent resident an awm loh avangin voters an ni theilo bawk. Hemi chungchangah hian Consultative Committee chuan General Seat awm thin chu voters an tlem avangin awm tawh lo tur leh inthlan hmasaa General Seat a dah Ward IX pawh hmeichhe ward tur zawnna draw of lots ah telh ni se, a ti.
Aizawl khawpuia mihring cheng an pun chak avangin thlanmual indaihlohna a nasa a. Veng thenkhatin man to takin hmun hla tak takah thlanmual ram an lei a, death rate sang chho zel thlirin kum tam tak daih thei lo tur a nih bakah inphumna senso a sang telh telh a. Hei vang hian Consultative Committee chuan a duh apiang hman theih tur thlanmual intawm Common Cemetery siam a tul tawh hle niin a hria a. Tuna hmalak nghal mai theih thil nilo mahse Mizo khawtlang nun leh tihdanphung milin ngun leh zuala ngaihtuah zui tha an ti a ni.
Vawiin meeting ah hian Mizorama District Headquarters hrang hrang Lunglei, Champhai, Kolasib, Serchhip, Mamit, Lawngtlai leh Saiha a Municipal Council emaw Municipal Board emaw siam chungchang sawiho niin UD&PA department in a tul angin hma la zel se, an ti a. Mipui nuai 3 chuang chenna khawpui Aizawl-ah Mayor neia Municipal Corporation din chungchang te, Municipalities Act siamthat chungchang te pawh sawiho a ni. Hei bakah hian UD&PA department in sawrkar laipui hmasawnna programme hrang hrang - National Uban Livelihoods Mission (NULM), Swachh Bharat Mission (Urban), Atal Mission for Rejuvenation and Urban Transformation (AMRUT), Smart City leh Housing for All (Urban) an kalpui dante Committee hmaah hian tarlan a ni a. North East State te hmasawnna atana dah 10% Lumpsum Grant hmanga hmasawnna ruhrel an din hrang hrang te pawh sawilan a ni bawk.
Meeting-ah hian Parliamentary Secretary Pu Hmingdailova Khiangte, MLA pathum - Pu Lalrinliana Sailo, Dr K.Beichhua leh Pu Lalruatkima bakah State Election Commission Commissioner Pi L.Tochhawng leh Secretary Pu H.Darzika, UD&PA Secretary Dr.C.Vanlalramsanga leh mi pawimawh dangte an tel.
