Vawiin khan Pu R. Romawia, Higher & Technical Education etc. Minister chuan Govt. Hrangbana College Golden Hall Annex-ah XXXV Session of Mizo History Association Seminar-cum-Annual Conference a hmanpui a. MHA Journal a tlangzarh nghal a. MHA te hian thupui atan Revisiting Mizo Custom and Ceremonies an hmang a ni.

History chungchang hi zirfe leh ngaihtuahna hmang taka kalpui ngai chi a niin thenkhatah chuan a ni leh kum dik takte hriatchian lohte pawh a awm thin a, chuvangin sawidan pawh hi hrang hrang awm thei anih thu khuallian Pu R. Romawia chuan sawiin tunhma chuan chhinchhiahna thlap thlapte a awm mumal lova, kan hnam ziarang leh kan thawnthu sawi dante pawh a hrang thin. Helama nasa taka hma lo la tu Pu B. Lalthangliana te lozir nasat avangin tam tak kan hriat theih phah a ni, a ti a. Tunah chuan inbiakpawhna leh hmanruate a tha tawh a, khawvel pawh a zim ta sawt a ni tih mai turin chanchin engkim kan hre zung zung thei tawh a. Chuvang chuan kan ram thil thleng leh chanchinte dik tak leh tha taka kan ziaka kan chhianchhiah a nih loh chuan nakin zel atan a la pawi thei dawn a ni a ti bawk.

Hnam tin hian tih dan hrang hrang kan neih laiin thlahtu bul emaw pi leh pu te emaw biak hi tih dan fo a lo ni tawh thin a, Israel hote pawhin Abrahama Pathian, Isaaka Pathian, Jakoba Pathian tiin an thlahtu bul hming an chhal thin a, Mizote ngei pawhin Pi Biakin lo chhang ang che, Pu Biakin lo chhang ang che, an ti a. Vai film ah te pawh an nu leh pa te thi tawh thla biain an lo chak phah thin, chutiang chuan thlahtute ah kan in nghat a. Chuvang chuan thil kal tawh hnu ang zul hian kan ngaihtuahna leh kalphung hi kan nunpui avangin History hi ngaihtuah chian leh zir tham tak a ni, a ti.

Prof. Darchhawna, President, MHA vawiin programme kaihhruaitu chuan keynote address pe in Mizo History chungchang leh vawiin a seminar hman dan turte a sawifiah a. Prof. Sangkima, Secretary, MHA chuan kimchang takin report a pe bawk.

Seminar hi nilenga neih tur a niin mithiamten thupui hrang hranga paper an buatsaih te an sawiho a ni.