Mizoram Sawrkarin mipuite hnena public service chi hrang hrang a pek chhuah thinte hunbi tiam chhung ngeia a pek chhuah thinna tur dan “The Mizoram Right to Public Services Act, 2015” chu ni 01.12.2015 hian a taka hman tan tur alo ni ta.
He dan hian India khua leh tui te chu Sawrkar in public service a pek chhuah thin te dilna an thehluh atanga hunbi tiam chhung ngeia an dawn tawh na turin chanvo (right) a pe a ni.
He dan Section 4-na hnuaiah hian Mizoram Sawrkar hnuaia Department hrang hrang pasarih, heng – Food, Civil Supplies & Consumer Affairs Department, Transport Department, Taxation Department, Rural Development Department, Finance Department, Social Welfare Department leh Public Health Engineering Department te’n mipuite hnena public service an pek chhuah thin sawmnga leh pakhat (51) te chu India khua leh tui (citizen) in public service pe chhuaktu Designated Officer hnena ziaka dilna a thehluh atanga hunbi tiam chhunga (Time Bound) an dawn theihna turin Sawrkar in tahrik ni 18.11.2015 khan thu a lo chhuah tawh a ni.
He dan Section 4-na hnuaia public service hrang hrang hunbi tiam chhunga pek chhuah tur hi Mizoram Sawrkar chuan notify belh zel ala tum mek bawk a ni. Public service chi hrang hrang hunbi tiam chhunga pek chhuah tur te hi a pechhuaktu (Designated Officer) office tinah Notice Board hmanga tarchhuah mek bawk a ni.
He dan hnuaia miin public service a dawn emaw/dawnloh chungchangah emaw lungawilohna a nei anih chuan zualkona tur First Appellate Authority leh Second Appellate Authority te ruat vek an ni bawk.
First Appellate Authority chuan Designated Officer in a chhan leh vang thatak nei lova miin public service a dil a pechhuak duhlo nia a hriat chuan Designated Officer chu cheng 500 atanga cheng 5000 thleng a chawi tir thei a. Tin, First Appellate Authority chuan Designated Officer in a chhan leh vang thatak nei lova miin public service a dil chu a pek hunbi tiam chhunga a pe lo nia a hriat chuan, a pek hunbi tiam ral hnu atanga a pek chhuah hma zawng nitin cheng 250 a chawitir thei a, cheng 5000 thleng chawitir theih a ni.
He dan hnuaia Public Service hun bi tiam chhunga pek chhuah thin tur langsar zualte chu:-
1. Ration Card
2. Job Card under MGNREGA
3. Way Bill
4. Professional Tax Clearance Certificate
5. Driving Licence with Smart Card
6. Renewal of Driving Licence with Smart Card
7. Registration of Vehicles with Smart Card
8. Domestic Water Supply Connection
9. Disability Certificate
10. Pension Payment Order
The Mizoram Right to Public Services Act, 2015 chungchanga hriattur pawimawhte chu DP&AR Website, mizodpar.nic.in ah engtik lai pawhin hmuh theih reng a ni.
