Pu R Romawia, Speaker, Mizoram Legislative Assembly chuan vawiin khan Tawngtaina In, Hrangbana College chhawng chung berah Mizo Writers’ Association Annual Meeting a hmanpui. Khawmpui ah hian Translation Book Award 2011 leh Mizo zirlaite zinga Mizo Subject a mark hmu sang berte hnenah chawimawina an hlan bawk.

Pu Romawia chuan mi thahnemngai te, zirtirtute leh Association te thawhrimna azarah Mizo tawng MA thleng a zirtheih hi lawmawm a tih thusawiin Mizo Writers’Association te hi Mizo tawng ngaihhlutna chang hria, vawnghim a, ti darhzau zel tumtu an ni chu a ropui a ni a ti. Speaker chuan Mizo tawng hi Pathian min pek a ni a, hnam inpumkhatna a ni a ti a. Lehkhabu tha lehlin avanga Mizo tam zawkin lehkhabu chhiar tur an nei chu lawmawm tiin lehlin hna hi chhunzawm zel turin Speaker chuan a chah bawk a ni.

Translation Book Award 2011 hi Pu Thankima, ‘Desert Flower’ letlingtu hnenah hlan a ni.

Mizo Writers’ Association (MWA) chuan kum 2088 kumah khan HSLC, HSSLC, BA Mizo Honours leh MA (Mizo) te University emaw Board exam emaw a ti tha berte hnenah a tum khatna atan 9.9.2008 khan Mizo Proficiency Prize pathum a semchhuak a. He proficiency Prize hi kum tin neih ziah tura ruahman a ni. Zirna lama zofate tana mi tangkai leh hriatreng phu nia a ngaih mi pali MWA chuan a thlang a. Chungte hming chawi chuan MBSE hnuaia HSLC, HSSLC leh MZU hnuaia BA Mizo Honours leh MA Mizo subject a mark hmu sang ber theuh hnenah heng Mizo Proficiency Prizes hi hlan an ni a. He prize hian certificate leh tangka fai Rs. 5000/- (cheng sang nga) a keng tel a, a sum fai hi Prize hming putute chhungkaw thawh (contribute) a ni. HSLC a Mizo subject a ti tha ber lawmman chu Ch. Pasena Prize tih a ni a, HSSLC a Mizo subject a ti tha ber lawmman chu Lalmama Prize; BA Mizo Honours a mark hmu sang ber lawmman chu R. Buchhawna Prize tiin, MA Mizo a sang ber lawmman chu J. Malsawma Prize hming put tir an ni.