North East Theatre Festival -2017 vawiin atanga  hman tan, ni thum awh tur chu  Pu  R Romawia, Art & Culture Minister in  Vanapa Hall ah a hawng.

North East Zone Cultural Heritage, Ministry of  Culture, Govt. of  India leh Art & Culture Department, Mizoram te tangdun buatsaih  NE Theatre Festival hawn programme ah hian khuallian  Pu R Romawia chuan  lemchan hmanga kan hnam ziarang entir leh phochhuahna hun tha tak vawiin a neih a ni chu lawmawm a tih thu leh ni hlimawm tak a nih thu  sawiin  kan Mizo  thawnthu leh kalphung  hnam dang, a bik in North East India te mithmuha lantirna  hun remchang tak anih avangin a remchangin a pawimawh hle  thu a sawi a. Vanapa Hall-ah  vawiin atanga tunkar Inrinni thlenga Drama chhuahte en turin  mi tin a sawm nghal a ni.

Nikum  September  khan  North-East Zone Cultural Centre (NEZCC)  leh Mizoram  Art & Culture Department te buatsaihin ‘20 Days  Theatre  Workshop’ Aizawlah buatsaih a nih thu leh chumi  atanga hmalakna kal zelah vawiin a Theatre Festival pawh hi a hlawhtlinna rahchhuah a nih thu Pu R Romawia chuan sawiin he lemchan kutpui neih chhung hian  mitin ten an vanneihzia hre tur leh tangkaipui  ngei tura  a beisei thu sawiin  State dang Meghalaya leh Arunachal  Pradesh atanga he hun hmang tura lo kal  te nen pawh in unauna lo zual zel a, thawk ho zel tura lungrualna  lo awm se a duh thu a sawi bawk.

Pi Thanhliri Pachuau, Secretary, A &T Department kaihhruai vawiin programme ah hian  Pu Swapnanil Barua (Rtd IAS ) Assam chu khual zahawm a ni a. Pu R. Hmingthanzuala Director A&T Department in  lawmthu a sawi hnu ah Mizoram Troupe in Drama show an entir a ni.

Naktuk Ni 13^th January, 2017  chhun dar khat ah  Meghalaya  in an entir ve anga, a tuk leh ni 14^th January, 2017 ah  Arunachal  Drama show  en ho a ni leh ang.