Vawiin chawhma khan Directorate of Land Revenue & Settlement Technical Hall-ah Pu R.Romawia Minister of Land Revenue & Settlement hovin Meeting of Survey Officer and Surveyor neih a ni.Aizawl District leh District hrang hrang atangin he meeting hmang tur hian Surveyor te an kalkhawm.

Land Survey pawimawhna sawiin Pu R. Romawia chuan tun hma sap ho hunlai chuan Tlangsam kung ilo te chu ramri chhinchhiah nana hmang in,ram thla, luikawr te chhinchhiahin tuihna awmna te Map ah an ti lang vek thin a. Tunlai hunah erawh chuan Surveyer te hna chu rampum buaipui aimahin inhmun lo ram diltu te dil lai teh fel leh, lo chhinchhiah chu kalphung a nih tawh thu a sawi a. Ram hi Lalpa ta a ni tih hriaa heng khehpuam, chiahpuam ah te ,In leh lo hi hman loh tur a ni tiin, kan fimkhur tawk lohna ah leh inhmun teh fimkhur tawk lohna avang hian thu buai hla buai a tam phah thin a. Nakin lawkah chuan ram inchuh buaina avang hian tualthahna ah kan lut mai ang tih te pawh a hlauhawm a. Nunna hi kan kutah a awma, thisen mawh hi kan la phur thei a ni tih hriatreng a tul thu leh fimkhur a ngaih thu a sawi.

Department in Field Worker ten pool vehicle an neih loh leh Surveyer te indaihloh na ah te, thil dangah pawh an harsatna te chu a hriatpui thu sawiin Minister chuan hmalak pui theihna ah puihzel a inhuam thu leh dawhthei taka nghah erawh chu a ngaih thu a sawi a. Ram leh hnam hmangai taka thawk tura ngenin surveyer te zinga thenkhatin ram teh sak te hnena pawisa dil leh an file nawr kal nana pawisa phut ching an la awm thin ni a mipui lam atanga thuhriat a nei thin chu pawi a tih thu leh tunhnuah awm tawh lo se a duh thu a sawi a. Mizoram hi mihring nuai 10 chauh leh Mizoram Sq. Km 21,081 leh Autonomous Area chhut tel lo phei chuan Sq. Km. 17,130 chauh a ni a. Zopa pakhat pawhin buh tin thum hmun hneh takin a thlo chhuak thei a lawm tiin Mizoram chhung chu hre chiang tur leh fel fai taka hnathawh tum turin a chah a,tih nuam tak leh thuawih taka in awm chuan in rama thil tha te hi in ei ang tih kha hre chiang ber tu Department an nih angin neitu chan chang a fel leh taima taka thawk turin Minister hian a sawm nghal.

Pu R. Lalramnghaka Director, Land Revenue & Settlement kaihhruai vawiin meeting ah hian Pu Rinzamlova, Head Surveyor pawhin thu sawiin post ruak hnawhkhah theih a nih loh avanga Surveyor te indaih lohna thu Minister hnenah hian thlen a ni a.Department tana tha tur leh hriat loh inhrilh nan leh sawihona hun an hman zui nghal a ni.