Pu Lalrammawia’n a vawikhatna atana a lemziah te pholanna a neih ‘Solo Painting Exhibition’ chu vawiin khan Pu Ramchuana, Additional Secretary, Finance Department in Aizawl Art Gallery ah a hawng a. Solo Exhibition hi Information & Public Relations in visual arts hmasawnna atana sum an dawn atanga buatsaih a ni.

Pu Ramchuana chuan Information & Public Relations Department in visual arts leh film tih hmasawn nana an sum hmuh ang ang te tha takin an hman nia a hriat thu sawiin Sawrkar kalphunga thil pawimawh ber chu sum hmuh ang ang te a hmanna tur dik taka hman a ni, a ti a. Visual arts tih hmasawn nana Department hma laknate te chu a tam thawhkhat tiin a lawmawm a tih thu a sawi a. Ram pawna programme hrang hranga sawmna dawng lemziak mite an tel ve theih nan scheme engemaw duan chhuah tha a tih thu a sawi lang bawk a ni.

Programme hmanpuitu dang Pi Lallianpuii, Director, Information & Public Relations Department chuan mimal lemziah pholanna Solo Painting Exhibition nei thei an pung chho zel chu art hmasawnna ani tiin hetiang a Solo Exhibition neih hian midangte tan chona lian tak a siamsak thin tih a sawi a. Department chuan visual art development hrang hrang painting, film leh photography pual programme te a kalpui thin a, hei hi thalai te talen haichhuahna leh nunkawng dik an zawh theihna tura puitu a nih bakah eizawnna tha buatsaih sakna a ni, a ti a ni.

Department leh Mizoram Art Development Society (MADS) thawhhona a pung zelin rah tha a chhuah mek tih sawiin painting te, film te leh photography te puala programme hrang hrang buatsaih thin hetiang lama tui leh kal thalai te hmakhua ngaihna thil a ni tih a sawi tel bawk.

Programme kaihruaitu Pu Laltanpuia, President MADS chuan kawng hrang hranga art lama in hmang te he lama ke pen mek ten Sawrkar duhsakna an dawn ah lawm thu sawiin heng programme kaltlangin mi tam takin hma kan sawn a, Sawrkar sum sen hi a thlawn lo a ni, a ti.

Solo Painting Exhibition hawnna ah hian Pi K. Vanlalsangi, Deputy Director leh Nodal Officer (Arts & Films) ni bawk bakah MADS hruaitute leh lemziak mite an tel a. Solo Exhibition ah hian Pu Lalrammawia kutchhuak 33 phochhuah niin 31 chu acrylic a ni a, a bak 2 chu water color painting a ni a. Solo Exhibition hi March ni 20 (Zirtawp Ni) thleng a awh dawn a ni.