No.592/2021-2022

Dated Champhai, the 20th May, 2021: East Tuipui Bialtu MLA leh Bamboo Link Road Board Vice Chairman ni bawk Pu Ramthanmawia ruahmanna kaltlangin a bial chhung khaw hrang hrangah lockdown vanga chhuanchham ven nan leh harsate tanpui nan buhfai sem mek zel niin, tun tum atan hian bag 270 semchhuah a ni ang.

East Tuipui bialtu MLA Pu Ramthanmawia chuan a bial chhung khaw hrang VLTF te thawhrimna chu fakawm a tih thu sawiin, ram leh bial chhung him nan theih tawp chhuah chhunzawm zel turin a chah a. Bial chhungah tumah chhuanchham an awm lohna tura tangrual puiah khawtlang hruaitute chu sawmin, mahni khua theuh uluk taka lo vil a, lockdown kalpui avanga ei leh bara harsatna tawk an awm chuan in thlahrung lova a hnena hriattir zel turin a chah a ni.

Pu Ramthanmawia chuan a bial chhungah lockdown vanga chhuanchham an awm hlauvin hma a la chho zel a, Ration Card nei lo chhungkaw 357 atangin mi 1112 leh raltlan mi 1030, an vaiin mi 2142 leh khaw hrang hranga VLTF ten dawng awma an ngaih chhungkaw engemaw zat hnenah buhfai hi sem a ni ang a, heng bakah hian a tul dan a zirin ruahmanna siam chhoh zel tum a ni.

East Tuipui bial chhunga buhfai sem runpui hi nimin atang khan tan a ni a. Buhfai hi khaw hrang hrangah bialtu MLA aiawh ten sem kualin, VLTF kutah an hlan zel a. VLTF te hian an mahni khua theuha dawngtu turte hnenah an sem chhuak leh dawn a ni. Vawiinah East Tuipui hmar lam khuate sem zawh a ni ang a. Naktuk hian bial chhung chhimlam khuateah sem chhunzawm leh tur a ni.

Buhfai sem rual hian East Tuipui bial khaw hrang hrang VLTF te hnenah a tul leh pawimawha an lo hman turin sum fai tanpuina pek nghal zel an ni bawk a, a vaiin Rs 1,83,000/- sem chhuah tura ruahman a ni.