242/2023-2024

Champhai, the 27th April, 2023: Vawiin khan Pu Ramthanmawia, MLA & Vice Chairman, Bamboo Link Road Board chuan Gov't. Thanchhuma High School, Farkawn Golden Jubilee lawmna khuallian niin a hmanpui.

Thusawiin Pu Ramthanmawia chuan kum 50-na lawm hi thil har leh namailo tak a ni a, Govt. Thanchhuma High School-in kum 50-na hmel hmu theia Pathian hruaina a chang chu lawmawm a tih thu a sawi a. He hun thleng thei tura Farkawn khawtlang hruaitu leh School Management Committee bultantute leh a hnu zela enkawl chhotute, School din chhoh nana sum leh pai thawhtu he School hming tumtu Farkawn Lal hnuhnung ber Pu Thanchhuma tu leh fate, zirtirtu hna lo thawk tawh leh thawk mekte inpekna leh thawhrimna fakawm a ti a. Zirna chu ram leh hnam, khawtlang leh chhungkaw tan hmasawnna lungphum pawimawh tak a nih thu sawiin, tun lai khawvel hmasawnna kan hmuh mek pawh hi zir thiamna avanga thleng thei chauh a ni, a ti a. Govt. Thanchhuma High School chu mi thiam tam tak chherchhuaktu niin Farkawn khawtlang tan a pawimawh hle a, a pawimawh zel dawn a ni, a ti bawk.

Khuallian chuan sikul hming atan Lalte chawimawia Farkawn Lal hming khawtlangin an hmang chu fakawm a tih thu a sawi a. Mi hmasate kan ngaihlut leh chawimawi thiam hi a pawimawh hle a ni, a ti a. Bial chhung zirna Sawkarin a vei thu sawiin, zirtirtu hrang hrang MR Teacher, CSS Hindi Teacher, SEDP Teacher, Samagra Teacher, HSS Lecturer thar 147 lai bial chhungah dah a ni a. Kum 2019 ah HSLC result-ah Undivided Champhai District MLA bial 5 ah a hniam berah awmin 50% ni ?hin kha tunah chuan 60% ah a kai chho tawh a ni, a ti bawk.

Khuallian chuan Zirlaite chu ruihhlo laka fihlim tur leh aia upate zahna chhawm nung zel turin a fuih a, tihtakzeta zirna kawnga hlawhtling tura bei tur leh School leh khawtlang tihmingthatu nih tum turin a chah a. Kum tina sem thin bial chhung School atanga HSLC & HSSLC Distinction-a pass-te hnena Laptop pek thin dawng theitu nih vek tum turin Zirlaite a chah a ni.

Jubilee lawmna programme hi Govt. Thanchhuma HS tualzawl Pandal-ah neih niin, he School a lo lut tawh tlang hrang hrang amite leh Farkawn mipuite'n Jubilee lawmna hi an hmanpui a. Session I leh II awmin zaithiamte nen nilengin hun hlimawm tak hman a ni. Tlaiah Jubilee ruai an theh bawk. Hun khatna hi Pu J.Nichhuma, Headmaster-in a kaihruai a, Pu C.Lalrammawia, Jubilee Organising Secretary-in report a pe a. Khuallian Pu Ramthanmawia'n Jubilee Souvenir a tlangzarh a, khuallian bakah Pu H.Lalhminghlua, Addl. DPC Champhai, Pu C.Lalramliana, VCP Farkawn, Pu Rikhuma, Donor leh Pu B.Zaliana te'n thu an sawi bawk. He School-a lo lut tawh mi hmingthate hnenah chawimawina thuziak cheimawi hlan a ni bawk.

Govt. Thanchhuma High School hi kum 1973 ah din niin, 1975 ah Adhoc Aided-ah hlankai leh a ni a. Kum 1985 ah Deficit GIA a ni a, 1991 ah Govt. School-a hlankai a ni. He School a lo lut tawh zawng zawng hi mi 1969 an ni a. HSLC Exam hmachhawn tawh mi 1097 awmin heng zinga 625 in an pass chhuak  a ni. He school a lo  lut tawh mi 31 zet Gazetted Officer an awm tawh bawk.