No.2588/2021-2022
Aizawl. 13th October, 2021 : 25-East Tuipui Assembly Constituency bialtu MLA Pu Ramthanmawia, Bamboo Link Road Board Vice Chairman ni bawk chuan vawiin chawhnu dar 1 khan Sesih PHC, Champhai District-a hman turin MLA Fund atanga ruahman Ambulance (Maruti Eeco Van) thar chu Sesih PHC Medical Officer (MO) Dr. Eric Zaukhnin kutah a hlan.

Ambulance thar hlanna leh lawmna hun Pu T. Nghakliana kaihhruaiah thu sawiin, Pu Ramthanmawia chuan Sesih PHC a Ambulance dah tulna leh mamawhnate hriaa PHC huam joint VC te hmalakna leh thahnemngaihna fakawm a tih thu sawiin, Ambulance thar lei leh PHC a dah mai piah lamah a enkawl zui zel kawngah tihtur dangte a la tam a, ngaihtuahna nasa tak seng chunga joint VC te inpekna leh inhuamna avanga Ambulance neih a ni thei ta chu lawmawm a ti a. Sawrkar hriatpui thlap leh sawrkar ta Ambulance chu neitu thinlung pu chunga enkawl turin a chah a ni.

East Tuipui bialtu MLA chuan hrileng avanga fimkhur tak chunga hun hman a nih thu leh bial mipuite harsatna hriatpuia a ngaihven reng thin thu a sawi a. Hrilengin engtikahnge min kiansan ang tih hriat ni lo mahse min chenchilh tlat tawh a, fimkhur takin nunphung pangngai hloh chuang lova khawsak zir thiam a tul a ni, a ti a. Ram ropui leh hmasawn zawkte pawhin hripui lakah harsatna tam tak an tawh thu sawiin, hripui leng karah sawrkarin theihtawp chhuaha hma a lak zel thin thu leh damkhawchhuahna turin theihtawpa a beih thu a sawi a. Ram hruaituten mahni inhaivur leh nawmsakna thlahlel lova mirethei leh pachhiate tanpui tura inpekna an neih a tul takmeuh thu sawiin, mipuite chu ram leh hnam rawngbawl kawngah hun tha leh lawmawm zawk a thlen ngei theihna tura theihtawp chhuahpuiah a sawm a ni.

Bamboo Link Road Board Vice Chairman chuan Covid-19 hrileng avangin hmasawnna hnathawh thuanawp rih mah se, sawrkar flagship programme SEDP kaltlangin hrileng boruak ziaawm ve leh chak taka hmalak tum a ni, a ti a. Bungzung PHC sak zawhah Sesih PHC sak that hna pawh hmabaka neih a nih thu sawiin, a bial chhungah hmasawnna ruhrel thawh chhoh mek leh hawn mai theihte a awm nual thu a sawi a. Kum khat chauh Doctor-in a la thutchilh Sesih PHC ah hmasawnna hmuh theiha a awm thu tarlangin, Nurse leh hmanraw indaihlohnate pawh Department hotute nena inrawntlanga buaipui zel tum a ni, a ti a. Sesih PHC in a huam khaw pali Sesih, Khuangleng, Lianpui leh Leisenzo te bakah a chhehvel hnaivaia mi ten tangkai taka an hman ngei theihna tura duhsakna hlan chungin Dr. Eric Zaukhnin, Medical Officer, Sesih PHC kutah Ambulance chahbi a hlan chhawng a ni.

Dr. R.Lianmawia, CMO, Champhai chuan sawrkar dan zam ang thlap leh nakin zel pawha harsatna awm lo tura Ambulance thar tha tak Sesih PHC bialtu MLA in a pe chu lawmawm a tih thu leh fakawm a tih thu a sawi a. Damlo mamawh apiang ten a tulna ang zela an hman theih tur Ambulance a awm ta chu mipuite tana tangkai tak tur a nih thu sawiin, PHC in a huam khawtlang hruaitute chu a cheibawl leh enkawl kawnga an tih theih angahte phur taka puibawm thin turin a chah a. Covid-19 hripui inkaichhawng zel tur chhu chat tura Mizoram sawrkarin hmaituamna hman uar inzirtirna 'All Mask Campaign' a kalpui mek chu thuawih taka zawm theuh turin a sawm a. Champhai District chhunga Covid-19 dinhmun tlangpui a tarlang bawk a ni.

Thusawitu dang Pu C.Lalhmachhuana, S.E, PHED Champhai WATSAN Circle chuan van ruahtui tla khawlkhawm a tul thu leh, tui hna siamtu ber ramngaw humhalh kawngah theihtawp chhuaha tanlak a tul thu sawiin, sik leh sa inthlak danglam chak lutuk avanga tui harsatna awm mek chu tih takzeta vei a hun tawh thu a sawi bawk.

He hunah hian Pu Kimzama, Vice President, Leisenzo VC chuan hunserh hmangin, Pu K. Ngaihthanga, VCP Leisenzo in kalkhawmte lawmna thu a sawi a. Dr. Eric Zaukhnin, Medical Officer, Sesih PHC leh Pi Laltlansangi, VCP Khuangleng te hnen atangin thusawi ngaihthlak a ni bawk a. Pu Dalngothanga, VCP Sesih in lawmthu sawiin Ambulance thar hlanna leh lawmna hun hi a khar a ni.

Vawiin chawhma khan Pu Ramthanmawia chuan Khuangleng Branch YMA hnenah Oxygen Concentrator a pek bakah, VLTF hnenah Test Kit, Sanitizer leh Mask a pe bawk.