Nimin  khan 25 East Tuipui Bialtu MLA Pu Ramthanmawia chuan 5 MW pe chhuak tur Khuangthing leh Thekpui inrina a luang Tlawva lui hmanga Tlawva Small Hydel Project siam mek  chu a hmunah tlawhin hnathawh dan a enfiah.

Pu Ramthanmawia hi Sr. Executive Engineer R. Lalrinkima, Tlawva Project Construction Division leh Engineer dangte’n an tawiawm a. Kawlphetha siamchhuahna hmun tur inpui (Power House) chu a ruhrel siam zawh tawh niin khawl rit pui pui dahna tur thirchakai (crane) siam mek a ni a. Khawl khawhvirna tur tuidawt lian (Penstock pipe) pawh Power House thleng zam ni tawhin, thir kahtui hmanga charzawm pawh a chanve aia tam zawh tawh a ni. He hnathawktu Company-te hian harsatna hrang hrang an neih avangin Department-ah kumin 2019 June thla thleng hun  dil belhin zawh hman an inbeisei a ni.

Cheng Nuai 5670 hmanga “Turn Key Contract”-a an thawh mêk Tlawva Small Hydel Project hi NORTECH Power Project Private Ltd, Kolkatta te'n an thawk mek a,  hnathawh zawh hun ruahmanah zo hman lovin MLA Subject Committee II te’n kum 2015 October ni 27 khan a hmunah tlawhin hna chak taka thawh turin an lo hrilh tawh a ni.

Tlawva Mini Hydel Project tlawh hnu hian Bialtu MLA Pu Ramthanmawia hian Khuangthinga zirna in hrang hrang leh Anganwadi Centre-te tlawhin an hnathawh dan leh an harsatna te a hmunah a hmuhpui a. Nimin tlai khan Khuangthing Committee Hall-ah Champhai Sub-Hqrts Conference 2020 Organising chairman a nihna angin Committee a neihpui a. Conference atana inbuatsaihna hrang hrangte a kaihhruaiah  thlirho nghal a ni. 

Attachment

  • Loading attachment...