Vawiin chawhnu khan Champhai Officers’ Club (COC) chuan tun thla tir February Ni 6, 2019 a Champhai Zotlanga kangmei chhuak avanga chhiat tawkte tanpuina tura member-te atanga vehbur tlingkhawm hlanna an nei.
Hemi puala inkhawm tawi buatsaihah Pu RL Thianghlima, President, Champhai Officers Club chuan Zotlangin mei kang nasa zawk tuar thei anih laia mitlawmngai leh kangthelhtu te zara chhiatna tam zawk a thleng lo chu vanneihthlak a tih thu a sawi a. Kangmei tuar te chhawmdawl tura YMA te hmalakna chu fakawm a tih thu a sawi bawk.
Pu Biaktluanga, VCP Zotlang pawhin thu sawiin, Champhai Officers Club-te kangmei tuarte chhawmdawl tura an penchhuak chu chhuanawm a tih thu a sawi a. An thiltih chu an khawtlangin an hriat reng tawh tur thu a sawi.
He hunah hian Champhai Officers Club (COC) hruaitute, MJA Champhai District member, khawtlang hruaitute leh kang tuar chhungte an tel a ni. Kang tuar chhungte chuan Champhai Officers Club ten tanpuina sum an hlan chu thinlung taka an lawm thu an sawi a ni.
Vawiina COC bultuma tanpuina sum tlingkhawm hlan tak hi Rs 102000/- a ni a. Tanpuina hi chhungkaw pali Pu Lallianpuia, Pu Lalrinfela, Pi Vanlalruati leh Pi Lalsiamkimi te hnenah Rs 25700/- theuha hlan a ni. Champhai Zotlangah hian vanduai thlak takin kumin February ni 6 chawhma dar 10:30 khan kangmei a chhuak a ni.
Champhai Officers Club hi kum 1992 a din niin, Pawl ang hian tanpui ngai te tanpui leh chhawmdawl kawngah hma an la fo tawh thin a. Nikum April Ni 16, 2018 a Myanmar ram chhung Tiau lui kama awm Khawmawi khaw In 9 kangah pawh memberte-ah vehbur khawnin tanpuina sum an pe a, Krismas dawnah luanchhuahna program an nei thin bawk.
